P1.7-B danyos ni ‘Kristine’ sa omahan sa Camarines Sur

An provincia nin Camarines Sur na tambubong nin paroy sa Rehiyon Bicol iyo an may pinakahalangkaw na destroso sa omahan huli kan bagyong Kristine na nagcacantidad nin P1,727,195.543.96 base sa datos kan Department of Agriculture.

Uminabot sa 34,035 an apektadong paraoma, 22,200.83 na hektaryas an inabot nin halangkaw na tubig baha na nakaralapa si anihon nang paroy. Igua man nin 11,361.94 hektaryas na partially damage asin nasa 89,961.46 na metrico tonelada an nasayang.

Sa ibang provincia, sa Albay nag-abot sa P368,615,224.29; sa Masbate – Php243,618,081.87; sa Camarines Norte – P192,117,754.80; sa Sorsogon – P169,372,133.39; asin sa Catanduanes – P83,150,331.56.

An datos na ini base sa damage report kan DA petsado Noviembre 6, 2024.

Sa record kan PAGASA Southern Luzon sa Camarines Sur iyo si dakul an binagsak na uran mala ngani kun ikukumpara sa normal rainfall na dapat 280.6 millimeter (MM) alagad sa laog sana nin mga pag-uran kan Oktubre 21-22, 2024 mas dakul si binagsak na uran na nag-abot sa 679.2 – MM. An nangyaring calamidad sa Bicol iyo na si pinakagrabeng binagsak na uran na pati na si kalangkawan sinakat nin tubig baha.

Sa ribo-ribong paraoma na apektado kan nakaaging calamidad maabot sana sa diez mil na paraoma sa Camarines Sur asin Albay an nakarecibe nin tig-a Php10,000 kabale si mga parasira. An ayuda tinao mismo ni President Ferdinand Marcos Jr. kan magbisita sa Camarines Sur asin Albay kan Noviembre 6.

An mga benepisyaryo iyo si enterong apektado asin mayo nang paglaom na makarecover sa saindang omahan, sinda anas rehistrado sa Registry System for Basic Sector in Agriculture.

Alagad segun sa DA si dai nakaayon sa listahan tatawan nin libreng banhi asin vegetable seedlings.