P2.7M shabu nakumfiscar sa drug pusher sa CamSur

Saro naman na drug pusher sa Camarines Sur an nahulog sa pinagsarong fuersa nin mga awtoridad sa Bicol matapos matalikop an suspek sa buy-bust operation an Php2.7-M na cantidad nin shabu sa operasyon sa barangay San Esteban, Nabua, Camarines Sur alas 5:30 nin aga kan Domingo, Hulyo 7, 2024.

Sa report kan Camp BGen Simeon Ola kan Bicol PNP an joint operatives kan Nabua MPS, nangenotan sa grupo, asin an Provincial Police Drug Enforcement Unit kan PPO Camarines Sur sa koordinasyon kan PDEA Bicol an suspek pigbisto sa alias ‘‘Ala’’ nagpabakal nin ilegal na droga sa police poseur-buyer asin nakumfiscar sa saiya an walong heat-sealed transparent plastic sachets na naglalaog nin shabu, na nagtitimbang nin 400 gramos.

An suspek na sarong ‘‘high value target’’ nag-aatubang na nin caso sa pagbalga kan RA 9165 na midbid sa Comprehensive Dangerous Drugs Act of 2002.

Dai palang nahahaloy an MPS, Libmanan, Camarines Sur nakakumfiscar man nin Php3.1-M na cantidad nin shabu sa suspek na sarong police corporal kan Quezon City Police District na pigbisto sa alias na ‘‘Anton’’ sa ginibong joint operation kan mga awtoridad sa Bicol.

An sunod-sunod na operasyon sa ilegal na droga sa Bicol nagpapaheling na padagos an giyera kan PNP laban sa droga sa pamamayo ni PBEGN Andre Dizon, sa kooperasyon kan comunidad maging manlaen-laen na ahencias de gobierno.