P40 inaprubaran kan RTWPB: Karapatan Bicol disganado sa inaprubaran na wage increase

Sabihon man na naglangkaw an sueldo kan mga empleados sa pribadong sektor sa Bicol alagad disganado an progresibong grupo sa P40.00 na wage increase base sa inaprubaran kan Regional Tripartite Wages and Productivity Board (RTWPB) na babangaon pa sa duwang pago poon sa Abril 5, 2025 sa enot na ‘‘trance’’ asin an sunod na ‘‘trance’’ sa Deciembre 1, ngunian na taon.

Ini an mga pahayag kan Karapatan Bicol sa pamamayo ni Vince Casilihan matapos ipaluwas na kan RTWPB an saindang inaprubaran na wage increase na P40.00 bilang kasimbagan sa pagralangkaw kan mga prime commodities sa mercado.

Kulang pang ibakal sa sarong kilo nin bagas sa presyo ngunian na P50 hasta P60 cada kilo maging sa kilo kan sira na inaabot na ngunian sa P150 hasta P250 asin iba pang produkto, sabi pa ni Casilihan.

Antes inaprubaran an dagdag na minimum wage nag-agi sa proceso sa paagi nin mga consultasyon sa rehiyon sa presencia nin mga employer, kabale an business sector asin representantes hale sa sektor nin trabajadores asin NEDA. An consultasyon ginibo kan wage board sa cada provincia sa Bicol na iyo an saindang pigbasehan sa paghaman nin desisyon.

An dagdag na sueldo hale sa P395 minimum wage malangkaw sa P435 cada aldaw.

An ‘‘katiting’’ na dagdag sueldo kabaliktaran na dapat an sueldo kan empleados ngunian P1,000 cada aldaw resulta kaini, mas lalong nagtitios an dati nang mga pobre, sabi pa.

Sinabi man kan ibang negosyante na dakul pa sa sainda an apektado kan nakaaging calamidad kan Oktubre 2024 dakula si danyos mantang dawa nag-utang sa bangko nganing ipadagos an negosyo dai pa nakaka-recover.

An dagdag sa sueldo epektibo na sa Abril 5, 2025 matapos kan mga proceso kabale na an pagpublicar sa lokal na dyaryo.