P400-M na proyekto sa Naga pig-endorsar na sa DPWH

Papabulosan nin P400 milyones kan Department of Public Works and Highways (DPWH) an duwang mga darakulang proyekto sa infrastractura sa Ciudad nin Naga matapos eendorsar na ni Camarines Sur 3rd district Congressman Gabriel H. Bordado Jr. an propuestong proyekto kan City Hall.

An congresista personal na nakiulay sa opisina sentral kan obras publica an pamayo kan ahencia nganing makaayon sa 2024 National Expenditure Program (NEP) kan DPWH an mga mayor na proyekto kan lokal na gobierno kan ciudad sa pamamayo ni Alcalde Nelson Legacion.

Kinumfirmar ni Bordado an mga proyekto na papabulosan nin milyones peso na fondo kinababalihan kan Construction of Magsaysay Avenue (national highway in Brgy Balatas) to Concepcion Pequeña (Daang Maharlika Highway) bypass road – na may cantidad nin P200-M asin Construction of Bagumbayan Calauag-San Felipe bypass road – na may cantidad nin P200-M.

Si DPWH Secretary Manual Bonoan (sa too) asin Congressman Gabriel H. Bordado Jr. (sa wala) retrato ninda matapos eendorsar sa DPWH an mga proyekto sa infrastractura sa ciudad nin Naga.

An sinambit na proyekto pig-endorsar ni Bordado dai palang nahahaloy nganing matagamahan nin fondo nasyonal asin bilang suporta kan lehislador sa lokal na gobierno kan ciudad.

Mientrastanto, si Consejal Vidal Castillo, pamayo kan Committee on Infrastructure sa Sangguniang Panlungsod nagpahayag man na dakulang bagay an suporta ni diputado Bordado mantang nagsasadit na an mga tinampo digdi huli ta naghihibog na an bulos kan trafico sa mga mayor na tinampo.

Afuera pa kaini, nagkapera nang mga proyekto sa infrastractura sa ciudad an nakatalaan iimplementar segun sa mga enot na pahayag sa media ni Alcalde Legacion. (dpa)