P48-M pinabulos na fundo kan DPWH sa ‘‘solar studs project’’

Maabot sa P48-M na cantidad sa proyekto kan solar studs kan Department of Public Works and Highways Rehiyon cinco na pig-implementar sa paagi kan Camarines Sur 3rd Engineering District Office (DEO) makakatabang nganing maalerto an mga motorista sa saindang pagmanijo sa national road mantang maliwanag na orog na kun banggui kabali na kun panahon nin tig-uran.

Sa pinaluwas na press release kan DPWH Bicol na instelar an solar studs sa Naga Carolina-Panicuason Road, Ciudad nin Naga na may laba nin 5.028 kilometros na pigfundohan sa irarum kan Motor Vehicle User’s Charge (MVUC).

Sinabi ni Director Virgilio Eduarte katuyohan kan saindang ahencia para sa ‘‘safety of motorists’’ na napapakinabangan na ngunian an liwanag kan tinampo pasiring sa upper barangay kan ciudad. An kaparejo nang proyekto igwa na sa Barangay Del Rosario national road asin sa Pili, Camarines Sur.

Naheheling na ngunian kan mga tsuper an kagayonan kan proyekto asin saro man atraksyon sa kalabaan kan tinampo na saro nang ‘‘hazard – free routes’’, sabi kan DPWH.

An upper barangays kan ciudad dakul nang mga vehiculos an nagdadalagan aroaldaw mantang nagkapera na an mga subdivision asin hotel digdi.

Yaon pa digdi an Metro Naga Sports Complex na perming nagkakaigwa nin mga sports competition maging kan Palarong Bicol asin iba pang sports event.