PAG-ANDAM SA SEGURIDAD SA MIDTERM ELECTIONS: PNP, AFP amay naglatag nin tropa sa Masbate
Naglatag na nin tropa kan PNP asin duwang batalyon kan Philippine Army sa Masbate sa mga lugar na yaon sa listahan kan areas of concern kan Commission on Election sa maabot na 2025 midterm elections nganing maseguro an seguridad sa panahon kan campaign period sagcod nang sa aldaw nin pirilian.
An Masbate cada eleksyon perming pigdedeclara sa irarum kan elections hot spot alagad an opisyales kan PNP asin AFP nagpahayag kan saindang kaandaman sa pagmantenir kan paz y orden sa provincia tanganing macierto an malinig asin matuninong an election period sagcod nang sa aldaw nin pirilian.
Antes kan pagwarak kan tropa nagkaigua ngona nin Send-off Ceremony kan Enero 31, 2025 para sa advance deployment of troops na ginigibo sa Camp Col Bonny Serrano kan PNP Provincial Office sa Ciudad nin Masbate na pinangenotan ni Abogado Alberto Canares III, Comelec Provincial Election Supervisor, PCol. Jeferson Araojo, Provincial Director kan Masbate PNP, asin kan mga opisyales kan AFP na sinda Lt. Col. Francis Espiritu kan 96th IB asin Lt. Col. Dennis Santos kan 2nd IB asin presente man an mga City asin Municipal Election Officers hale sa manlaen-laen na municipalidad kan sinambit na provincia.
Magigirumduman antes kan actividad kan Enero 29, 2025 si General Romeo Brawner, nagbisista sa Masbate asin nagseguro an duwang mga pamayo kan IB na seseguradohan an matuninong na seguridad sa sinambit na provincia.
Sa mensaje ni Canares, pinagirumdum kaini an tropa kan gobierno sa pag-implementer kan mga election laws.
Kabale na digdi an gun ban, check point operations asin iba pang leyes na may relasyon sa seguridad.
Sinabi man ni Araojo na afuera sa seguridad seseguradohon an presencia kan mga awtoridad sa election areas of concern asin iba pang homa sa seguridad.
Comments