Pag-isyu nin gun ban exemptions limtado sa pribadong indibidwal

An Commission on Election (Comelec) naglinaw na limitado sa mga pribadong indibidwal an puedeng ma-isyuhan nin exemptions sa gun ban base sa seksyon 261 sa resolusyon kan Omnibus Election Code.

Si Abogado Maico Julia Jr., Election Officer kan Ciudad nin Naga nagpahayag na kabale digdi an ‘‘cashiers and disbursement officers and persons carrying large sums of money or valuables’’ mantang kabale man si may mga homa sa buhay alagad dapat mag-apply sa Comelec.

An aplikasyon puedeng sa paagi nin online na nagpoon kan Nobiembre 18, 2024 asin sundo sa Mayo 28, 2025.

An pahayag na ini kan Comelec sa Ciudad nin Naga mantang nag-epekto na an gun ban kan Enero 12, 2025 asin igua nang mga Check Point na pigbugtag sa mga estraihicong lugar an Comelec sa coordinasyon sa Philippine National Police.

Nagpatanid pa an ahencia asin PNP na siisay man madadakopan nin ilegal na armas asin patarum puedeng malaom sa carcel sa maximum period na dai masobra sa anom na taon asin dai mababa sa sarong taon depende sa diskresyon kan jusgado.

Alagad an mga opisyal kan gobierno na exempted sa ban kinababalehan kan Presidente kan nasyon; Bise Presidente; Speakers asin miembros kan Camara de Representante, Chief Justice and Associate Justice kan Supreme Court; Cabinet Secretaries, Undersecretaries; Assistant Secretaries asin iba pang opisyal kabale sa Executive Branch; mga juezes kan RTC, MTC, asin miembros kan Judicial and Bar Council; Chairpersons, Commissioners, Executive Director, Deputy Executive Secretary, asin mga abogado na nagkakapot nin posisyon sa Main Office kan Comelec; Chief of Staff of the offices of the chairman and commissioners; Regional Election Directors, Assistant Regional Directors, Provincial Election Supervisors, Regional Election Attorneys; Chairpersons and Commissioners of the Civil Service, Commission of Audit, and the Commission of Human Rights. An sinambit na exemption nakadetalye sa Seksyon 14 kan Comelec Resolution No. 11067.