Pagbaba nin tarifa sa kuryentekan Casureco II, panamit sana

Nagbaba si tarifa sa kuryente kan Camarines Sur II Electric Cooperative (Casureco II) na nag-epekto sa billing kan Febrero 2025 hale sa P7.9663/kWh sa residential na naghuros sa P4.7335 alagad piglinaw kan manijamiento panamit sana ini matapos magbaba man si generation costs. Sa commercial – P3.8992/kWh asin sa industrial – P2.7688/kWh.

Daing kasegurohan an cooperativa kun igua naman nin pagbabago nin tarifa ngunian na Marso 2025 mantang nagdedepende sa generation costs kan saindang mga power suppliers, sabi ni Rinner Bucay opisyal na parataram kan Casureco II.

Nagtutubod an manijamiento kan Casureco II na sinda an may pinakahababang tarifa alagad nagdedefende sinda sa presyo kan nababakal na suplay nin kuryente sa mga power suppliers siring kan Wholesale Electricity Spot Market (WESM).

Kan mga nakaaging bulan an saindang tarifa sa residential nag-abot sa P8.00, P7.00 asin sa ngunian P4.00 alagad temporaryo sana.

An Casureco II iyo an pinakadakulang cooperativa nin electricidad sa Camarines Sur na iguang maabot sa 150 mil na miembros-consumedores hale sa Ciudad nin Naga, Calabanga, Siruma, Tinambac, Bombon, Magarao, Canaman, Minalabac, Milaor, asin Pili.