Pailaw sa Pasko may darang ogma saka kuwarta

Ni Sonny Malate

Lagonoy, Camarines Sur --- Apwera sa daradarang kaogmahan sa comunidad,  an mga pailaw sa Pasko sa Partido Area nagtatao pang oportunidad sa saradit na mga entrepreneur asin negosyante tanganing makapabakal kan saindang mga producto digdi.

Ini minaresulta sa dagdag na ganada na kaipong gayo ngonian  na deficil an pagbuhay. Dugang man ining  ingreso o revenue sa  gobyerno local na nagkokolektang  aldawan  na plasada o registration fee sa mga ocupante nin puwesto.

Segun ki Jonathan F. Bacares, designadong Business Processing and Licensing Officer (BPLO) sa  banwaan kan Lagonoy, pira nang taon ngonian, durante sa panahon na iguang ilaw-ilaw sa Pasko sa Lagonoy  Municipal Plaza, an mga saradit na entrepreneur asin negosyante digdi naglalatag nin mga puwesto harani sa lugar kan pailaw para sa saindang mga paninda.

Huli sa dakol  na mga residentes asin  dayo na nagbibisita sa ilaw-ilaw kada banggi,  nagigin marikas an bentahan kan mga paninda na ikinakaogma kan mga stall holders.

Pigbuyagyag ni Bacares na ngonian na taon, an local na gobyerno sa paagi ni Alkalde Delfin (JB) F. Pilapil III, nagtagamang espasyo  para sa 25ng saradit na negosyante. An kadaklan na mga paninda iyo an street foods arog kan barbecue, siomai, bulastog asin iba pa.

Tanganing maseguro an kalinigan kan panindang mga kakanon, higot na pigsusugo kan alkalde an mga street vendors na mag-agi sa procesong pinapautob kan Sanitary Inspector kan Rural Health Unit. 

An Negosyo Center kan DTI sa Lagonoy sa paagi ni Rhea De Alday, Business Counselor,  igua man nin dakulang  booth kun saen pigsararo an mga local entrepreneur. Mga  panindang local na producto arog kan samhod asin ibang handicrafts  an mababakal digdi. May mga producto pang hale sa cacao, mani, turmeric asin kadakol pang iba

Manonotaran na an Lagonoy mayaman sa mga local na productong ginigibong manlaenlaen na handicrafts asin kakanon  para sa local asin international na mercado.

Sinabi ni Bacares  na si Alkalde Pilapil bilog an suporta sa mga saradit na entrepreneur  mantang sinda naglalapigot  sa paghanapbuhay asin nakakacontribuer sa pagparambong kan economia asin turismo kan banwa.

Nagpagiromdom  man an BPLO officer  sa mga negosyante sa Lagonoy  na mag-aprobechar kan Business One Stop Shop (BOSS) na ilalatag kan LGU Lagonoy sa maabot na Enero 3 hasta 31, 2024. An BOSS piggigibo tanganing magin marikas asin magean  an transaction sa gobyerno.

Mientrastanto, sa iba pang  pailaw sa Pasko sa Partido Area, an mga local  na negosyante asin entrepreneur nagkaigua man nin kaparehong oportunidad na makapaghanapbuhay sa paagi kan paglatag nin pwesto harani sa vicinidad kaini. 

Sa banwaan nin Goa nagkaigua liwat nin Christmas Bazaar kun saen man-iba-ibang paninda an mabenta sa mga local na residentes asin mga dayo na nagpapasyar sa mga ilaw kan Pasko.  

Sa banwaan man kan San Jose ibinalik giraray an Banchetto de San Jose asin arog kan dati, an mga negocianteng nagbale digdi  nakaguno nin marikas na ganancia sa kadakulan kan mga tawong nagbibisita digdi.

An pailaw sa Partido Area madurar hasta sa primerong semana kan Enero, 2024,  kaya an mga negosyante na may puwesto digdi maogma huli sa ganada na piglalaoman ninda.

An booth kan DTI Negosyo Center kan LGU Lagonoy para sa mga saradit na entrepreneur sa banwaan na ini. (Photo: LGU Lagonoy, Camarines Sur).