Partido area igua nang modernong mini-bus

Goa, Camarines --- Nagpoon nang mag-operar an modernong unit nin mini-bus sa mainland kan Partido kan nagtalikod na semana.

Sinabi ni Julius B. Amante, Chairman kan Partido-Naga Van Express Transport Cooperative, Inc., sinda nagcomple na kan kasugoan kan Public Transport Modernization Progtam kan Department of Transportation (DOTr)  An ley piglatag pa kan 2017 asin hasta sa ngonian dakol pang nasa negosyo kan transporte an dae pa nagcocomple digdi.

Pigcomfirmar ni Amante na initialmente, anom na unit muna nin mini-aircon bus an nagpoon magdalagan sa rutang Lagonoy- Naga asin vice versa. Finalmente, ini maabot sa 23 na units sa mga masunod na bulan. An mga unit nasa irarom kan pangaran na A-Team Bus. 

Mga miembros kan transport cooperative naggigikan sa banwaan kan Goa asin pagtaraid na banwaan.

An mini-bus may seating capacity na 27,  afuera kan driver’s seat, may makusog na aircon unit, may wi-fi service, modernong ticketing gadget asin CCTV para sa coveniencia asin seguridad kan mga pasaheros.

Segun pa man ki Amante, an saindang empleados nag-agi sa training para sa first-aid procedure tanganing efectivong makasimbag sa emergencia sa periodo kan ruta. An mga empleados kadaklan dati nang nagtrabaho sa ibang transport company kaya may bastante nang kaaraman dapit sa trabaho ninda.

An A-Team Bus minahumale sa public terminal sa banwaan kan Lagonoy, minapondo sa Goa Integrated Central Terminal para magpasakay nin mga pasaheros. Sa mga inaagihan na banwa sa ruta, ini mina-pick-up asin minababa nin mga commuter.

Hale sa Partido, an bus minababa nin mga pasaheros sa may Robinson Place asin minaparada sa East Bound Terminal. 

An Partido-Naga Van Express Transport Express Cooperative, Inc. iyo an pinakaenot na transport group sa Partido Area na nagsunod sa kasugoan kan DOTr dapit sa modernizasyon kan mga pampublikong vehiculos.

An programa sa modernisasyon kan mga pampublikong vehiculos may katuyohan na magin efeciente an servicio kan transport sector. Siring man, tanganing maibusol an kalinigan kan kapalibotan.

Susog sa kasugoan kan programa,  an mga vehiculo na nag-eedad nang 15ng taon an dapat nang i-phase out na asin ribayan nin mga bagong vehiculo.

An programa sinabat nin pagcontra kan nasa public transport huli sa dakulang kantidad na invuelto asin pagkawara nin ganada kan nasa transporte.

Sa ngonian, an modernization program kan transport sector an padagos na pig-uurolayan sa Senado asin iba-ibang sector kan privado asin pampublicong sector.

An Naga-Partido Van Express Transport Cooperative, Inc. primerong nagcomple kan Modernization Program kan gobyerno. (Photo-PNVETC)