Partido area nakikisumaro sa kafiestahan ni Ina

Ni Sonny Malate

San Jose, Camarines Sur --- Bilang pagrokyaw kan celebrasyon kan kafiestahan kan  Patrona kan Bicol, Nstra. Sra. Virgen de Peñafrancia, an distrito kan Partido  an nakikisumaro sa pintakasi ni Ina. 

An celebrasyon mayormenteng kinababalehan kan traslacion procession  kan imahen kan Divino Rostro asin mismong kan Patrona, asin an fluvial (sa salog) asin maritime (sa dagat) kaini.

An celebrasyon kan kafiestahan ni Ina sa Partido Area ginigibo sarong semana antes kan mayor na celebrasyon kaini na nakacentro sa ciudad kan Naga sa ikatolong semana kan Septiembre kada taon. 

Ini sa pagmawot kan simbahan na an mga devotos sa Partido Area an makadalaw man giraray sa dakulang celebrasyon sa ciudad kan Naga. An celebrasyon kan pintakasi ni Ina pigrorokyaw kan mga devotos kaini sa bilog na kinaban.

Pinakadakulang local na celebrasyon kan pintakasi ni Ina sa Partido Area iyo an sa parroquia ni San Padre Pio na nakabase sa barangay Sabang, San Jose, Camarines Sur, sa pamamahala kan cura paroco kaini, Rev. Fr. Tito  M. Oliva. An celebrasyon nagpoon pirang decada na an nakaagi asin pigdadayo kan rinibong devotos ni Ina.

Ngonian na taon, piglalaoman na urog pang dadagsaon kan mga devotos an maritime procession sa parroquia huli kan buwelo asin mahiwas na espasyo kan Partido Boulevard. Ini an naghahanggilid sa mga barangay harani sa Lagonoy Gulf, na sakop kan parroquia.

Piglalaoman pa man na lalo pang makakahatak nin riboribong devotos asin mga turista an Partido Boulevard  oras na magbutwa na an higanteng icon kan imahe ni Ina sa San Jose Partido Tourism Hub sa sitio Talisay, barangay Dolo.

An tourism hub sarong proyekto kan local na gobyerno kan San Jose sa pamamayo ni Alkalde Jerold B. Peña. An turismo saro sa priority programs ni Peña na may katuyohan na magrambong an cultura, mapagayon an kapalibotan asin maggantad an economia kan banwa.

Apwera kan pintakasi sa parroquia ni San Padre Pio, an traslacion asin fluvial o maritime procession kan Patrona kan Bicol pigrorokyaw man sa haros gabos na sampolong banwaan kan ika-apat na distrito kan probinsiya. 

An pinakahuri, naiiba asin nakaagaw kan atencion kan mga devotos iyo an pagsakay ki Ina asin Divino Rostro sa irrigation canal sa parteng barangay Napawon asin Taytay, banwaan nin Goa, Camarines Sur. Sa pira pa sanang taon na pagcelebrar, ini an padagos nang namimidbidan asin pigdadayo kan mga devotos digdi siring man sa kataraid na lugar. 

Saen man na lugar, panahon asin paagi, an devotion kan mga Bicolano ki Nstra. Sra. Virgen de Peñafrancia, Mahal na Patrona kan Bicolandia, an padagos na nagdadanay.

Viva la Virgen! Viva el  Divino Rostro!

Maritime procession ni Ina asin Divino Rostro sa parroquia ni San Padre Pio na nakabase sa Sabang, San Jose Partido. (Photo - Isarog Radio Broadcasting)