PATANID KAN NGCP: Pagtukdok nin estraktura sa sirong kan tore, pinapangalad

Binuhay liwat kan National Grid Corporation of the Philippines (NGCP) an saindang patanid sa publico na maglikay na makarani sa linya nin kuryente o tore para man sana sa ‘‘kaligtasan’’.

An ponto komo nagmamakulog an korporasyon sa ano man na aksidente, girumdumon pirming mag-ibitar sa peligro sa makusog na bulos nin kuryente sa mga linya alagad posibleng maapektaran pa an saindang serbisyo sa pagsuplay nin kuryente sa mga cooperativa nin electricidad.

Kabale sa mga importanteng pangapodan kan NGCP na dai gibohon an pagpalayog nin buradol harani sa linya kan kuryente siring sa pagsakat sa mga tore na puedeng maging causa nin aksidente asin pagkakuryente; Dai magtanom nin ano man na kahoy harani o sa sirong sa linya kan kuryente; Dai mag-garaje o magpadalagan nin mga darakulang ekipahe harani sa linya kan kuryente o tore; asin dai magtugdok nin harong o anoman na estraktura sa irarum kan linya kan kuryente.

Hagad kan korporasyon sa mga opisyales de barangay na sawayon an arin man na indibiduwal na mapasay sa mga patanid na ini nganing saindang aksyonan.

Mientras tanto, nagpagirumdum pa an NGCP an pagbabawal an paghabon, pagpabakal, asin pagbakal kan ano man na parte sa tore kan kuryente, base sa Acta Republica 7832 o Anti-Electricity and Electric Transmission/Lines Pilferage Act of 1994.

An arin man na madadakop asin mapipinaran kan korte aatubangon an 12 hasta 20 taon na pagkapriso asin multang P50,000 hasta P100,000.

Sa mga magpapa-abot nin sombong sa ginigibong ilegal na actividad makakarecibe nin ‘pabuya’.

Ini an mawot mangyari kan NGCP malinig an sirong kan tore sa ano man na ilegal na estraktura.