Petisyon ni Baldo na magtenir sa Albay, binasura kan corte

Dai tinugotan kan corte an petisyon ni dating Alcalde Carwyn ‘‘Awin’’ Baldo kan Daraga, Albay na naghuhurot magtenir sa Camalig Municipal Police Station huli kan kamatean sa salud.

Kan Septiembre 9, 2024 nagsangat nin petisyon sa corte an abogado kan alcalde na nag-aatubang nin duwang casong murder nin Urgent Omnibus Motion nganing dai na siya haleon sa PNP MPS kan Camalig huli sa mga minamating helang na diabetes mellitus, hypertension, asin an pinakahuring na-diagnose bronchial asthma.

Huli sa pagbasura sa petisyon nakatalaan ihubo an dating jefe ejecutivo sa selda sa Ciudad nin Manila sa Camp Bagong Diwa, Bicutan, Ciudad nin Taguig mantang igua man mga hospital digdi.

Siya nagsuko sa Camalig MPS kan Agosto 26, 2024 iyo pigtutukdo sa pagbadil gadan ki AKO Bicol partylist Representative Rodel Batocabe asin police escort M/Sgt Orlando Diaz kan Deciembre 22, 2028.

An mandamiento de aresto sa alcalde pinaluwas ni Presiding Judge Acerey Pachero kan Regional Trial Court Manila kan Agosto 21, 2024 na pinapaaresto huli sa duwang casong murder sa pangagadan sa representante asin police escort.

Sa ngunian an nagtutukaw na acting Mayor iyo si Jungie Jaucian.

An desisyon kan jusgado pinasalamatan kan familia Batocabe.