PhilHealth Konsulta Caravan ginibo sa Goa

Ni Sonny Malate

Ginibo sa banwaan kan Goa, Camarines Sur an pinakahuring PhilHealth Konsultasyong Sulit at Tama (Konsulta)  Caravan sa paagi kan Camarines Sur PhilHealth Office sa pamamahala ni Annelene Z. San Pablo. 

An caravan inatendiran kan labing dos cientos na mga Barangay Health Worker sa 34ng barangay kan banwaan na ini. Ini ginibo sa pangengenot ni Al delos Santos, PhiHealth Konsulta Point Person. Nag-asiste iyo an personahes kan PhilHealth Camarines Sur asin Rural Health Unit kan Goa.

Nagin presente man sinda Bise Alkalde Antolin P. Respall na nagrepresentar ki  Alkalde Alfredo P. Gonzaga III na iguang importeng kalakawan sa Metro Manila. Siring man,  si Municipal Administrator Santiago N. Artiaga, Municipal Health Officer Dr. Diosdado Fuentebella asin duwang pag-iribang doctor sa RHU Goa.

Segun ki delos Santos,  an Konsulta Package iyo an pinahiwas na pangenot na  benepisyo kan mga rehistradong miembros kan PhilHealth asin legal dependents ninda.

Kairiba sa mga dagdag na benepisyo iyo an libreng consultacion, laboratory examination asin mga medicina.

An mga serviciong ini makokoa kan mga calificadong miembros asin dependents sa mga facilidad para sa salud arog kan Rural Health Unit asin ibang facilidad na nagpaacredit asin aprobado kan PhilHealth Office para digdi. Sa banwaan kan Goa, ini puwedeng aprobecharan sa RHU 1 digdi.

Sa presente, an PhilHealth Camarines Sur an nakaconducir na nin 13ng Konsulta Package Caravan sa bilog na probinsya. Sunod na padudumanan kan ahenciang ini iyo an doceng oficina kan gobierno sa ciudad nin Naga.

Pigbuyagyag kan Konsulta Package Caravan Point Person na an PhilHealth padagos na naggigibong mga policia para mapautob an comprehensibong Universal Health Care Program para sa namamanwaan.

Nagpagiromdom man ini sa mga miembros na dapat pirming may maninigong premium contribution tanganing makagamit kan benepisyo sa PhilHealth. 

Para sa mga naontok na an contribution,  siya nag-aviso na makipaghilingan sa Municipal Social Welfare Development Office para sa Certificate of Financial Assessment.

Dinagdag pa man ni delos Santos an pag-awmento kan mga binabayadan kan PhilHealth sa iba-ibang benepisyo. Siring man, an paghale na kan policia sa 90 dias na single period of confinement.

Mientrastanto, tanganing urog pang  masusteniran  an serbisyong pangsalud  kan namamanwaan, an local na gobyerno kan Goa sa pangengenot ni Alkalde Gonzaga asin Tanchuling Hospital, ciuad nin Legaspi,  an nagkaigua nang initial na meeting para sa posibleng iadaptar na public and private partnership.

Ini katakod sa pighihimong Municipal Hospital sa banwaan na ini. Oras na ini magkatotoo, dakol an naglalaom na ini maresulta sa dakulang karahayan sa comunidad sa Goa asin pagtaraid na localidad.

Si Al delos Santos durante sa PhilHealth Konsulta Caravan sa banwaan kan Goa, Camarines Sur (Photo Bicol Mail)