Pito na DEs kan DPW Hinokag ni Sec Mark Villar

Pigpunan na ni Secretary Mark Villar an pag-okag kan mga district engineers (DEs) kan Department of Public Works and Highways (DPWH) sa Bicol kasunod kan directiva ni Presidente Rodrigo Duterte na iimplementar na an pagbalasa sa mga DE bako lang digdi sa rehiyon cinco envez nationwide, alagad bako pa gabos.

Ini kasunod kan pigbuyagyag kan Presidential Anti-Corruption Commission (PACC) ki Duterte na nagkaperang mga opisyal kan ahencia an envuelto sa kurapsyon kasabwat an ibang mga congresista alagad mayong nakabale hale digdi sa Bicol.

Sa pinaluwas na Special Order na pirmado ni Villar petsado Enero 18, 2021 an mga inukag kinababalehan ninda DE Rebecca J. Roces hale sa Camarines Sur 3rd Engineering District madedestino na sa Masbate 3rd Engineering District, pigribayan siya ni DE Romeo D. Doloiras.

Si DE Gemma Timbang sa 5th Engineering District na kan Camarines Sur nagribayan sinda nin distrito ni DE Nestor Gerimbao na destino na sa CamSur 4th Engineering District; si DE Rainero Zerda bagong DE kan Albay 1st Engineering District, nagribayan sinda nin distrito ni DE Simon Arias na destino na sa Masbate 2nd Engineering District.

Afuera kan pagriribayan nin destino pig-designar man bilang OIC District Engr. Si Warren Azotea kan Albay 2nd Engineering District.

Dai palang nahahaloy nagkaperang mga DEs an inakusaran kan PACC na nakisabwatan sa may mga anomaliyang implementasyon kan proyecto sa infrastractura sa may katorceng congresista.

Si Duterte, iyo an nag-anunciar kan mga pangaran kan mga congressmen alagad piglinaw na bako pang pusog an mga evidencia sa pigsumiter na report sa saiya kan PACC.

Digdi na nag-orden si Duterte ki Villar na kaipuhan nang okagon an mga district engineers dawa si dai kabale sa pig-aakusaran sa isyu sa kurapsyon.

An mga lehislador tolos man nag-angal kan report kan PACC huli ta dai nag-agi sa due process.