Planong Partido Airport sa CamSur ipapadagos, sabi

An naguturog na propuestong Partido Airport sa San Jose, Camarines Sur na haloy nang ginibo an ground breaking ceremony kan panahon ni dating Speaker Arnulfo Fuentebella, pigseguro kan representante kan ika-limang distrito kan CamSur na saiyang ipapadagos an proyekto.

Ini an pahayag ni Congresista Arnulf Bryan ‘‘Arnie Fuetebella matapos kan saiyang ‘‘oath of office’’ kan Miercules, Hunyo 30 na ginibo sa Tigaon, CamSur nganing pakusogon an programa sa turismo sa provincia.

Bako lang an Caramoan, CSur an dinadayo nin turista sa ngunian maging sa mga banwaan Sagñay, San Jose asin iba pang lugar sa Partido area.

Makakatabang sa dalagan kan economiya sa Partido district asin dapat lang ipadagos an proyecto sa aeropuerto, sabi pa sa media ni Fuentebella.

An mga turista puede nang magdirekta kan saindang viaje sa mga tourist attraction kan sinambit na distrito.

Kan termino ni dating representante Noli Fuentebella, binasbasan na an mahiwas na lugar kan propuestong Partido Airport na presente si Secretary Arturo Tugade kan Department of Transportation (DOTr).

An nakaulang asin nakaabala sa proyecto huli kan pagcontra kan ibang mga politico sa Partido district asin Camarines Sur.

Igwa nang ginibong pag-aadal an DOTr na saindang pinaboran an planong pagbugtak nin sadiring aeropuerto sa sinambit na distrito.

Mayong naheheling na makumpetensya sa Naga Airport sa Pili, Camarines Sur envez makakatabang pa sa pasajeros na hale sa mga banwaan kan Partido area maging si hale sa Rinconada district. (DPAureus)