Pre-emptive evacuation pigpautob sa Partido Area

Ni Sonny Malate

Antes pang magtama sa kadagaan kan Kabikolan an bagyong Pepito, an mga local government unit (LGU) sa mga banwaan sa costales asin mainland kan Partido Area an nagpautob na nin pre-emptive evacuation didgi.

An mga personahes kan Municipal Disaster Risk Reduction and Management Office (MDRRMO) an mayormenteng nangenotan sa Evacuation Team na pigmobilizar sa pag-evacuar. Nagtaong suporta iyo an iba pang empleados kan LGU, PNP, BFP, oficiales de barangay asin ibang support staff.

An pre-emptive evacuation an pig-initiar kan mga local na gobyerno digdi tanganing malikayan na madanyaran an buhay kan mga residentes sa mga harababang lugar, harani sa salog o dagat, parating nagkakaiguang pagtiris nin daga asin ibang peligrosong lugar.

An bagyong Pepito na higot na pigbabantayan kan PAG-ASA-DOST asin iba pang weather monitoring agency an pighihiling na magigin sarong super typhoon. Daradara kaini an makusogon na duros asin tubig uran na piglalaoman madara nin baha na posibleng magresulta nin danyos sa buhay, infrastructura, agricultura, propiodad asin dakol pang iba.

Apwera sa parteng Kabisayaan, pighahaditan man na malalagarto kan raot kan panahon an Kabikolan urog na an mga banwaan sa Partido Area.

Sa banwaan nin San Jose, nagserbing evacuation center iyo an San Jose Cultural Center, Pimentel Building, San Jose Central School, San Jose National High School asin iba pang pampublicong escuelahan asin an simbahan kan Jesus of Later Day Saints sa barangay Del Carmen.

An PAGCOR Evacuation and Recreational Center sa barangay Salogon an nagin pailihan man kan dakol na residentes mismong kan barangay na ini asin pagtaraid na lugar.

An local na gobyerno kan San Jose sa pamamayo ni Alkalde Jerold B. Peña an suportado sa pagkakan, sanitasyon, seguridad asin ibang pangangaipo kan mga evacuees.

Mientrastanto, sa pagtaraid na banwa, pareho man sa San Jose, Noviembre 15 pa sana, naggibo na man nin pre-emptive evacuation an kada local na gobyerno.

Nagkakapirang mga banwaan sa Partido Area, arog kan Presentacion, Garchitorena, Caramoan, Sangay, Siruma, Tinambac asin Lagonoy- an may mga barangay na harani sa salog, dagat asin kabukidan asin dakula an huma kan baha asin pagtiris nin daga.

Sa mga banwaan na ini asin sa Tigaon asin Goa, an mga local na gobyerno an activong nag-initiar nin kaparehong pag-evacuar kan mga residentes pasiring sa mga designadong lugar bilang evacuation center.

Manonotaran na afuera sa evacuation center kan PAGCOR sa nagkakapirang banwaan, an cada banwaan sa Partido Area an may mga designadong evacuation area man. Ini an pampublicong escuelahan asin ibang structura, simbahan kan Romana Catolica asin ibang secta.

Sa mga barangay, an mga barangay hall na may duwa o tolong escalon an parating nagseserbing pailihan kan mga apectadong residentes. Siring man, an barangay health station asin Day Care Center na salbado sa huma kan baha.

Laen pa kaini iyo an mga privadong concretong mga residencia na nagigin bukas para sa mga pagtaraid na residentes tanganing ligtas sa huma kan mga raot kan panahon.

Sarong pamilya sa San Jose Cultural Complex na nagserbing evacuation center (Photo Bicol Mail)