Primerong Breastfeeding Station, Milk Depot Piglansar

SAN JOSE, Camarines Sur--- Piglansar an pinakaenot na duwang Breastfeeding Station asin Human Milk Depot sa bilog na Bicol kan tuminalikod na semana sa banwaan na ini. An facilidad nahimo sa initiativa kan Rural Health Unit sa pamamayo ni Dr. Arnel P. Armea. Yaon man an bilog na suporta kan local na gobyerno digdi sa pamamayo ni Alkalde Jerold B. Peńa, Department of Health-Bicol,  DOH Provincial Office asin ibang stakeholders.

An Breastfeeding Station namumugtak an saro sa ground floor kan lumang edificio municipal mantang an ikaduwa yaon sa Municipal Lying-In Clinic kun saen namumugtak man an Human Milk Depot.

An actividad pig-atendiran kan mga oficiales kan banwaan, Departamento de Salud,  mga nagpapasusong ina, Barangay Health Workers asin iba pang stakeholders.

An paglansar kan facilidad significante mantang ngonian na bulan na Agosto pigcecelebrar an Breastfeeding Awareness Month na pigtatawan nin kahalagahan kan RA 10028, an Expanded Rooming-in Act.

An ley nagmamando sa mga pampublico asin privadong employer na magbugtak sa edificio o lugar na pigtratrabahohan nin breastfeeding area na may privacy, iguang cerradora, may malinig na ginigikanan nin tubig asin may bastantang ventilation.

Saro sa mga nagpapasusong ina an nagdonar nin gatas para sa Human Milk Depot. (Photo: RHU/Sonny Malate)

Segun ki Kristoffer Dan A. Verdejo, Nurse II kan Rural Health Unit, an Breastfeeding Station magigin dakulang tabang sa personahes kan local na gobyerno na nagpapasuso kan saindang umboy. Susog sa Expanded Rooming-in Act, an empleadang nagpapasuso tinatawan nin 40 minutos kada aldaw sa paggamit kan breastfeeding station sa  laog kan periodo na iguang trabaho.

Maroromdoman na an local na gobyerno igua nang dating breastfeeding area kan nakaagin pirang taon, alagad ini dae susog sa standard na piglatag kan Departamento de Salud para sa arog kaining facilidad. nin huli sa esfuerzos kan Rural Health Unit asin suporta kan local government unit asin DOH nagkaigua nin duwang gayong bagong breastfeeding station.

Mientrastanto, an human milk depot na yaon sa Municipal Lying-In Clinic marecebi nin donasyon nin gatas gikan sa mga nagpapasusong ina na iguang bastanteng gatas. Ini itataong libre sa mga ina na mayo o kulang an sadiring gatas para sa saindang umboy. An natipon na gatas yaon sa refrigerator na pigdonar kan Breastfeeding Bicolana, sarong NGO.

Dinagdag pa man ni Verdejo na mabilog  sa mga barangay nin Breastfeeding Support Group tanganing magtabang sa Rural Health Unit sa paghanap nin mga nagpapasusong ina na madonar nin gatas. Ini titiponon sa human milk depot asin idodonar sa mga ina na kulang o mayo nin sadiring gatas base sa mga patakaran na ilalatag kan Rural Health Unit.

Sinabi pa man niya na an donor kan  gatas hahagadan nin health  declaration na rerepasohon kan Rural Health Unit. An marecebi kan libreng gatas tataohan man nin counseling kan personahes kan sinabing oficina asin papasabuton kan importancia kan gatas na hale sa ina. 

Pigreconusir kan Nurse II na mayormenteng nakatabang sa Rural Health Unit sa concepto na magbugtak nin human milk depot sa San Jose iyo si Ailene D. Calayo, Nutritionist-Dietitian kan DOH Regional Office 5.

An pagkakaigua nin human milk depot  narealizar sa suporta kan local na gobyerno, kairiba pa man an DOH Regional asin Provincial Office asin ibang stakeholders.

Ngonian na celebration kan  Breastfeeding Awareness Month orug pang tinatawan doon kan Departamento de Salud an importancia kan gatas kan ina bilang pinakamalinig, segurado asin baratong gatas.

An local na gobyerno man kan San Jose Partido sustenido an pagigin ‹‹mother-baby friendly» kun kaya an Rural Health Unit digdi padagos na nagtutulod kan mga programa  katakod sa breastfeeding base sa mga provisiones kan RA 10028.