Propuestong P1.5-B budget sa 2022 sesernihon na sa SP

Yaon na sa lamesa kan Committee on Appropriation sa Sangguniang Panlungsod kan Ciudad nin Naga an propuestong P1.5 bilyon annual budget para sa taon 2022, na may dugang na P200 milyon hale sa national tax allocation (NTA).

Si Consejal Ghiel Rosales, pamayo kan komite nagsabi na matalaan na sinda nin mga committee hearing nganing punan nang sernihon an mga nakatamang budget sa mga departamento asin iba pang mga opisina kan lokal na gobierno.

Alagad sa entrevista ki Budget Officer Francisco Mendoza an dugang na P200 milyon hale sa NTA haros natabla sana sa hababang koleksyon kan buwis sa mga negosyante mantang apektado kan pandemya.

An NTA, dating internal revenue allotment (IRA) naglangkaw nin P200 milyon kasunod kan implementasyon kan Mandanas ruling. Sa dating IRA si koleksyon sana sa buwis kan Bureau of Internal Revenue iyo sana an nadalagan sa LGUs alagad huli kan sinambit na ‘‘ruling’’ kabale sa marerecibe kan mga lokal na govierno iyo an koleksyon sa buwis nasyonal.

An saindang mga economic enterprises siring kan Naga City Public Market, slaughter house, Bicol Center Station apektado an koleksyon sa buwis huli kan labi nang sarong taon na pandemya.

Si Mendoza, nagtutukaw na city administrator nagsabi pa na saro sa tatagamahan nin fondo iyo an Covid-19 response na mayo pang kasegurohan an mga experto sa salud kun nuarin matatapos.

Kabale sa papabulosan nin dakulang alokasyon sa 2022 annual budget iyo an mga programa sa social welfare, nutrition, scholarship, asin medical assistance.

Nakatalaan ipadagos nurong taon an Community Employment Program na liwat tatagamahan nin dakulang alokasyon asin kaipuhan man makabangon an negosyante na apektado kan pandemya sa paagi kan Business Stimulus Program and Tabang Tugang.

Dinagdag pa ni Baldemoro an appropriation committee piglalaoman na tataposon ninda an mga hearing sa annual budget na posibleng abuton sa Deciembre 2021 nganing ma-aprubaran kan jefe ejecutivo an 2022 budget. (DPA)