Proyekto sa infrastractura papabulosan Php700-M

Apektado an nagkaperang mga proyekto sa infrastractura sa Ciudad nin Naga mantang nakatagama sa pambakal vaccines contra sa Covid-19 alagad mababawi sa huring cuarto ngunian na taon asin abuton pa sa 2022 nganing pabulosan nin Php700-M na fondo.

Si Consejal Vidal Castillo, chairman kan Committee on Infrastructure sa Sangguniang Panlungsod nagpahayag na kan nakaaging premiro asin segundo cuarto ngunian na 2021 nagkapera an na-implementar na proyekto kan ciudad alagad nabawasan si alokasyon nin huli ta mas prioridad madugangan an fondo sa paglaban sa Covid-19.

Alagad piglinaw ni Castillo an milyones peso na fondo hinahalat nalang ma-aprubaran sa Development Bank of the Philippines an saindang uutangon na Php700-M nganing isubasta na an mga naka-andam na proyekto na kinababalihan kan minasunod, 1. Php50-M para sa road construction (NCSH) – Balatas, 2. Urban redevelopment project cantidad Php200-M, 3. Construction of Naga City Hospital – Php350 na kumpleto nang ekipahes asin laboratory, asin 4. Socialized housing project cantidad Php100-M asin ini igwang total na Php700-M.

Dinagdag pa kan committee on infrastructure an mga proyekto sarong socio-economic development projects asin na-aprubaran kan local development plan para sa taon 2021-2022.

Pigseguro kan Sangguniang Panlungsod sa pamamayo ni Bise Alcalde Nene De Asis dai ma-aapektuhan an operational expenses kan ciudad nin huli ta kukuanon sa 20 percent local development fund an ibabayad sa utang asin sa iba pang mga sources.

Afuera pa kaini, puon sa 2022 an ciudad na sarong billionaire city makakarecibe pa nin dugang na Php260-M annual National Taxes Allotment (NTA) o si dating internal revenue allotment.

Maging si Consejal Salvador del Castillo, na sarong abogado asin Certified Public Accountant (CPA) asin vice chairman kan Appropriation Committee sa SP nagsabi na mayo man peligro na magkaigwang problema an ciudad sa operational expenses huli kan milyones peso na uutangon sa bangko.

An paglangkaw kan mga lokal na gobierno kan saindang marerecibing NTA huli kan Mandanas-Garcia ruling. (DPAureus)