RAP kan Comelec sundo na lang sa Agosto 31, ‘24

Tataposon na kan Commission on Election (Comelec) hasta sa Agosto 31, 2024 an Register Anywhere Program (RAP) dawa na ngani sundo pa sa Septiembre 30, 2024 an nagpapadagos na voter’s registration.

Si Comelec Regional Director Maria Juana Valeza nagpaluwas nang aviso sa publico nganing makahabol pa si mawot mag-aprubetsar kan RAP sa ultimodia ngunian na bulan.

Sa lindong kan programa, an arin man na botante tutugotan na magrehistro sa arin man na pinakaharaning opisina kan Comelec na dai na kinakaipuhan magpuli sa saindang residencia kun sain sinda dapat magboto, alagad an RAP sa mga provincial capitals asin sa highly urbanized cities sana.

An programa sa nagkapera sanang lugar digdi sa Rehiyon Bicol siring kan Daet, Camarines Norte, Ciudad nin Naga, asin Pili, Camarines Sur. Ciudad nin Sorsogon Virac, Catanduanes asin Ciudad nin Masbate sa provincia nin Masbate.

Sinabi pa kan Comelec na nagpapadagos pa an local asin oversea voter registration na ginigibo sa mga opisina lokal o sa embahada, konsulada o MECO sa Taiwan (overseas).

Sa satellite voter’s registration iyo ngunian an nagpapadagos huli ta kulang an nagpapalista sa mga opisina lokal kan Comelec. Katuyohan pa kaini, nganing dai na madificilan sa pagviaje an mga maparehistro envez sinda na an nadulok sa mga barangay, mall asin escuelahan.