REBULTO KAN CORAPTO

Tigsik ko an pagwaras nin ayuda

Parating kulog boot an daradara

Kun bako kan kaalyado kan paralista

Mayo kan mananamitan na grasya!

Tigsik ko pa an pagtao nin ayuda

Dapat rikasan bako pong abala

Dae pagtagoon, iluwas sa banwa!

Tibaad malapa sana sa laog kan bodega!

Tigsik ko man an pagwaras nin relief

Wow! Talaga naman makabad-trip

May pangaran ni Boss, pityur nakangirit

Apesar bako niya an budget, malupet!

Tigsik ko kun iguang calamidad

Aw ta an polpoliticong corrupt

Talinga sa talinga an ngarahab

Milyones an hinahabas na pirak!

Tigsik ko ining Calamity Fund

Tugang man sana kan Intelligence Fund

Burabod nin easy money kan may katungdan

Para ki Boss dobladong gatasan!

Tigsik ko an polpoliticong corapto

Mantang sige-sige an milagro

Kadakolon an nag-iidolo

Sa plaza, ginibohan nin rebulto!