Reclamo sa operasyon kan STL dapat isangat sa PCSO

Bukas an opisina provincial kan Philippine Charity Sweeptakes Office (PCSO) sa Camarines Sur tanganing magrecibe asin imbestigaran kun iguang formal na reclamo contra sa operasyon kan Small Town Lottery (STL), operator kan Evenchance Gaming Corporation.

Si Jobet Ramos, Provincial Manager kan sanga kan PCSO Camarines Sur dai pa lang nahahaloy naging bisita sa sesyon regular kan junta provincial sa Camarines Sur nganing hagadan nin paliwanag kun ano an ginigibong aksyon sa nagluluwas sa social media na iguang menor de edad pinapataya kan STL kolector apesar na prohibido ini base sa RIRR kan PCSO sa operasyon kan STL.

Sinabi kan provincial manager na andam magrecibe nin ano man na reclamo an saindang opisina alagad dapat yaon an ‘'identity’’ kan nagpapatayang kolector asin maheling sa retrato na minor de edad an nagtataya. Hinagad na dapat tabangan an saindang opisina kan ‘'identity’’ sa STL kolector asin kaipuhan maaraman kun saen na lugar nganing masusog kun siisay an kolector ta ciertong maatubang nin ‘'disciplinary action’’ sa operator kan negosyo.

An Capitolio Provincial enot nang nagpadara nin petisyon sa PCSO main office na dapat dai tugoton na maka-renew pa nin franquicia an Evenchance huli sa mga reclamo siring kan ginagamit na front kan ''illegal lotteries’’ pagpalyar sa tamang panahon pagremiso sa paagi kan bank account kan PCSO asin iba pang pagbalga sa mga reglamento kan Revised Implementing Rules and Regulations (RIRR) na nag-gogobernar sa operasyon kan negosyo, pagkua nin mga menor de edad na mga kolektor, pagpataya sa menor de edad asin iba pa.

An Evenchance napag-araman nagpadara kan saindang kasimbagan sa main office kan PCSO sa sinambit na mga akusasyon alagad mayong nangyari envez naka-renew pa kan saindang franquicia kan Febrero 29, 2024.