Rehistradong botantes sa Bicol uminabot na sa 4-M

Igua nang total na 4,068,307 rehistradong botantes sa rehiyon Bicol matapos kan pinakahuring Election Registration Board hearing kan mga election officer.

Ini an pigbuyagyag ni Atty. Maria Juana S. Valeza, Regional Director kan Commission on Election sa Bicol kan siya mag-atubang sa miembros kan media sa paagi kan ginibong Kapihan sa Bagong Pilipinas kan Philippine Information Agency (PIA) kan Noviembre 8, 2024, mantang padagos an saindang pag-andam para sa maabot na pirilian sa Mayo 2025.

Sa 1,434 posisyon iguang 2,136 na mga asperante sa rehiyon para sa maabot na eleksyon.

An nakatalaan na pirilian liwat magiging ''Full Automation System with Transparency and Audit/Count nganing maseguro an malinig na resulta kan pirilian.

Nag-apelar an ahencia sa mga politico na magtarabangan na maging matuninong asin malinig an pirilian sa rehiyon. Nagpagirumdom pa an Comelec Bicol na estrictong binawalan an arin man na candidato na magbakal nin boto huli ta may naghahalat na magabat na penalidad. Puedeng castigohon nin sarong taon asin dai mababa sa anom na taon na pagkaka-priso, habang buhay na dai makakaboto asin magpugol nin anoman na posisyon sa gobierno.