Ribong na an Balanak

Ribong na an balanak, sabi ni Ompong Baldemor, famusong peace and development consultant sa Minadanao asin sa United Nations.

Iyan pakatapos mag-react o magkomentaryo an kadakul na netizens na pig-post ko sa FB an rerato ni Presidente Duterte, Mayora Sara Duterte asin Sen Bong Go hali sa front page kan Philippine Star na pigbugtakan kong caption: “Puede sa Pinas, puede sa Bikol”.

Sarabi ninda-“Never again”.

“No way”. “Puede sipaon”. “Habo kong apudon gago, tano ta iboboto ko sinda?”. “An dami na pala ng kapay sa Pinas kung ganon, dadami pa ngayon”. “Robredo kami!” “Napangyayari”. “Anu???” “Dai lamang mano”. “Hehehe”. “Dai ko hay!”. “My God I hate drugs”. “Bako man patal an mga Pilipino, mas lalo an mga Bikolano”. “Marcos nag gibo highway pasiring Norte, Leni pa Bikol na man”.

May mga nagraway na “P.I.” mo ta lubog na daa an Pilipinas sa utang sa Tsina”. “Sara ako para sa continuity ni Presidente Duterte”. “Naku wa epek na”. “Diyan po ako dai uyon na marhay saimo”. “No no no to Duterte kapay an maboto pa dyan”. “Mga kurakot, dai ko!”. “295 milyon toilet, sori po no way”. “Ay Diyos ko patawaron kita ni Santa Maria”. “Bugbog abuton ta dyan, Diyos ko dai man lugod mangyari”. “Dai nindo ipabakal an saindong boto kuarta lang yan”. “Mas importante an karakter kan sarong tao, diyan maheheling an Bikolano asin Pilipino”. “Ha ha ha”. “Maski siisay talaga ma-mimis-interpret an saimong post”. “Je je just reading all messages…contemplating…magabat isipon an mga nangyayari mangadgie kitang marhay for enlightenment, protection and in unity, for truth and accountability”.

Asin kadakul pang ibang malalanit na komentaryo, muda, tabuga na dai puedeng ipublikar sa dyaryo.

Kan magluwas an retrato sa front page kan peryodiko national naisipan kong I post tangarig makua ko an reaksyon kan mga tao harayo pa man an eleksyon, dai pa ngani na plantsar kan certificates of candidacy an mga aspirante.

Pero marhay para sako an bunga kan siring na mga reaksyon ta nakua ko an tunay na sentimento kan manlaen-laen na tao.

An politika talaga perception o paghuna sana. Asin an sabi ngani an gabos na politika sa kinaban o sa Pilipinas pan-lokal sana.

An mga politiko o an mga kandidato maski bistado ta an pangaran pero dai ta lubos an saindang tunay na pagkatao, marhay o maraot, derekta o may pairarom.

Nagluluwas na an media lang ang pigbabatayan kan saindang mga bareta, inpormasyon asin komentaryo na iyo na an pigtuturubod. Arangguton pati kita. Pikon pa. An kakampi lang an marhay, an bako maraot. Gabos personalan.

An mga Bikolano anggot sa bakong Bikolano.

Pero bakong gabos kita Pilipino?.

An bobotohan ta bako an Presidente kan Bikol kundi an Presidente kan bilog na nasyon na may labing 7mil na islas, ginatos na tribo asin rinibong lenguahe asin dialecto. 110 milyones an populasyon.

Tama tong sarong nagsabi na magparangadgie kita asin maghagad nin kaliwanagan kan satuyang pag-iisip asin kan maguiguin desisyon sa maabot na eleksyon.

An pinakamahalaga anuman an maguin bunga kan borotohan mapakarhay an Pilipinas, burunyog an gabos na Pilipino, ma-asenso an satuyang nasyon, asin maliwanag asin magaya-gayang futuro kan masunod na henerasyon.

An Pilipinas dapat Independiente, may sadering paninindugan, mayong kaiwal asin amigo an kagabsan.