Rutang Calamba-Legazpi plano pa sana - PNR

Harayo pa sa posibilidad an pagbukas kan viaje kan Philippine National Railways (PNR) sa rutang Calamba-Legazpi alagad plano pa sana kan manijamiento.

Mala ngani sa rutang Naga-Ragay na dakul nang sektor an naghuhurot sa manijamiento dai pa mangyayari huli ta igua pang mga linya na kinakaipuhan pa an rehabilitasyon.

Ini an piglinaw kan PNR Bicol kan makunduciran nin entrevista kan Bicol Mail an manijamiento alagad an opisyal nagsayuma nang magpasambit kan pangaran sa tahaw kan nagluwas sa social media kan nakaaging mga semana na an ginigibong rehabilitasyon kan mga linya asin tulay sa South Line bilang pag-andam sa pagbuelta kan viajeng Calamba-Legazpi.

An mga ginigibong rehabilitasyon nganing maseguro na mantenidong pusog an mga relis asin tulay, sabi pa.

An Naga Station iyo na an central terminal kan perokaril asin binalyo digdi mantang nagpapadagos an mga patrabajo sa North trailway na posibleng aboton nin limang taon.

An mga ekipahes, mga bagon asin iba pang gamit sa dating central terminal sa Manila pighaharakot na digdi sa ciudad.

Antes kan pagpoon kan rehabilitasyon kan nakaaging ika-duwang semana kan Septiembre 2024 si General Manager Engr. Deovanni Miranda asin iba pang opisyal kan perokaril nag-inspeksyon kan mga linya asin illegal crossing sa Camarines Sur asin Albay.

An dugang na mga viaje kan perokaril sa Albay asin Camarines Sur paborable sa pasajeros huli ta barato an flete sagcod mayong problema sa trafico.

Magigirumduman an dating regular na viaje kan Bicol-Manila sinuspende kan Oktubre 26, 2012 matapos an makusog na bagyong Ofel sa Luzon sagcod na nagkaigwa nin mga destroso sa tulay asin linya.

An mga viaje sa ngunian kan PNR iyo an Calamba-Lucena, Naga-Sipocot, Sipocot-Naga, asin Naga – Legazpi.

PNR sa Libmanan, Camarines Sur saro sa may pinaka-gurangan na tulay kan perokaril sa Bicol na regular pig-iinspeksyon kan Engineering Departmen. (DPA)