SA 19th CONGRESS: Bed capacity kan BMC gigibohon 1,500 - GHB

Natawan tolos nin prayoridad na makahawas sa Committee on Health sa Camara-Baja asin yaon na sa lamesa kan plenaryo an House Bill 10311 na dagdagan liwat nin bed capacity an Bicol Medical Center hale sa 1,000 gibohon nang 1,500 kabale na an dugang na facilidades, doctors, nurses, iba pang personajes saka dagdag na fondo.

Si Congresista Gabriel H. Bordado Jr. kan tercer distrito kan Camarines Sur padreno kan HB 10311 nagpahayag sa Bicol Mail na ngunian na 19th Congress yaon na sa lamesa kan plenaryo mantang nagtitiwala siya na maaprubaran an propuestong ley para sa dugang na bed capacity kan pinakadakulang hospital sa rehiyon cinco.

Apesar enot nang na dagdagan hale sa 500 ginibong 1,000 bed capacity alagad liwat siyang nagsangat nin bill kan 18th Congress sa tahaw kan naheling niya mismo an kamugtakan kan mahibog na pasyente sa hospital.

Kan Hulyo 2020 na-aprubaran ni Presidente Rodrigo Duterte an saiyang bill na ngunian Acta Republica 11478 nganing dagdagan an bed capacity hale sa dating 500 sinakat sa 1,000 pati na an pag-upgrade kan mga facilidad asin professional health care services, medical work force asin dugang na fondo.

Alagad pakatapos nin apat na taon na maaprubaran an RA 11478 nagparadakul naman an mga pasyente sa BMC bako hale hali sa rehiyon cinco, igua pang hale sa Visayas asin provincia nin Quezon asin maninigo sanang maaprubaran an dugang na bed capacity para sa programa sa salud kan saiyang distrito maging sa bilog na provincia nin Camarines Sur asin pagtaraid na rehiyon.

Matapos an labi sa 25 taon na permanenteng 500 sana an bed capacity alagad saiyang naheling an pangangaipo para sa nagdadagmang na mga pasyente, sabi pa ni Bordado.

Kun maaprubaran asin maging ley an sinambit na bill magkakaigua liwat nin dugang na fondo kabale na sa General Appropriation Act (GAA) taon-taon.

Walong escalon na edificio kan BMC sa Ciudad nin Naga afuera kan tolo asin limang Escalon na pinakadakulang hospital kan gobierno sa rehiyon cinco. (Hehivmap.com)