SA 3rd IMPEACHMENT CASE VS DUTERTE: Pagpirma ni Rep. Bordado sa endorsement mayong nagdikta

Mayong nagtulod nin kaalyadong politico o arin man na grupo nganing eendorsar ko an 3rd impeachment case contra ki Bise Presidente Sara Duterte.

Ini an piglinaw ni House Assistant Minority Leader Representative Gabriel H. Bordado Jr. kan tercer distrito kan Camarines Sur sa programang ‘‘May Boses kita’’ sa RMN DWNX ni dating Alcalde Abang Mabulo sa ibong kan mga nagruluwas sa social media asin peryodico nasyonal na iguang nagtulod na politico na nasasambitan an pangaran ni dating Bise Presidente Leni G. Robredo.

Sinabi pa na antes siyang nagpirma binasa ngona an mga documentos na naheling kaini na iguang mga basehan asin evidencia mantang nagsunod sa saiya na nagpirma iyo si Representante Lex Anthony Cris Colada.

An sinangat na caso na pinangenotan kan lead counsel complainants Amando Virgil Ligutan contra ki Duterte iyo an ‘‘culpable violation of the Constitution, bribery, graft and corruption, plunder, malversation, and technical malversation, and betrayal of public trust’’

Maging si Robredo na bigla man kan mga nagluwas na bareta sa peryodico nasyonal asin social media apesar na dai man ngani sinda nagkaulay kan congresista antes nagpirma sa endorsement sa 3rd impeachment case.

Dinagdag pa ni Bordado na poon siya naglaog sa congreso kan 2016 hasta sa ngunian na matapos na an saiyang termino sadiring desisyon niya an ano man na tataramon asin bobotohan contra man o pabor.

Saiyang pighalimbawa si pagcontra niya sa extension kan martial law sa sarong lugar sa Mindanao sa panahon kan administrasyon ni Presidente Duterte, pagcontra sa Anti-Terrorism Act, pagsurog sa ABS-CBN na hinubaan nin franquicia sa dating administrasyon Duterte, asin pagcontra sa Maharlika Investment Fund, sa gabos na ini mayong papel digdi si dating VP Leni.

Maging an pagcandidato niyang bise alcalde sa Ciudad nin Naga para sa eleksyon sa Mayo 12, 2025 na ka-tandem siya ni Robredo pigsambit pa sa mga bareta apesar na dai man nag-aaram an tawo.

Napili an congresista na mag-candidatong bise alcalde kan dating VP bako niyang desisyon envez pinaagi sa konsultasyon sa manlaen-laen na sektores.

Kabale sa nagsangat caso contra sa bise presidente kan Deciembre 18, 2024 sa opisina kan House Secretary General Reginald Velasco, iyo an nagkaperang kapadian kan Catolico Romano, grupo reliyoso, asin mga abogado.

Si Duterte nagpahimotik kan mga alegasyon asin iregularidades sa paggamit kan confidential fund sa opisina kan VP asin kan Department of Education sagcod na naghelig sa posisyon komo sekretaryo.