SA BICOL: 2 provincia dae kaayon sa pigdeclarang FSE kan DA

Duwa sa anom na provincia sa Bicol an dai kaayon sa pigdeclarang Food Security Emergency (FSE) for rice kan Department of Agriculture central office huli ta dai apektado sa paglangkaw kan presyo nin bagas.

An Albay asin Catanduanes iyo sana an dai kabale sa mga provincia na declaradong FSE, alagad an consumedores digdi nagrereclamo mantang halangkaw an presyo kan bagas sa saindang mga mercado tano ta dai pigbale.

Sa entrevista kan Bicol Mail sa DA Bicol sa paagi kan saindang regional spokesperson Lovella Guarin sinabi kaini an listahan kan saindang ahencia hale sa rekomendasyon kan National Price Coordinating Council.

Epekto kaini, an sinambit na duwang provincia dai masusuplayan kan baratong presyo kan NFA rice an mga LGUs nganing ipabakal sa consumedores.

Hinahagad kan consumedores nin bagas kan Albay asin Catanduanes sa mga opisyales kan saindang provincia na ireconsiderar giraray kan DA central office ibale an saindang provincia.

Sinda kabale sa mga apektado kan mga nakaaging calamidad kan nagtalikod na taon sagcod milyones de pesos si danyos sa sektor agricultura orog na sa kaomahan asin maisan.

AN DA central office nagdeclara nin food security emergency for rice kan Febrero 3, 2025 huli kan paglangkaw kan presyo nin bagas sa mga mercado. An declarasyon na ini nagtutugot sa National Food Authority na ipabakal an saindang stock nin bagas sa mga LGUs asin iba pang ahencia asin Kadiwa outlets nganing magpabakal kan baratong presyo nin bagas.

An ahencia nagpaluwas na nin guidelines kan Febrero 18, 2025 sa pagpaluwas nin stock nin bagas sa mga LGUs na dapat cada banwaan iguang alokasyon.