SA CAMARA-BAJA: Pagbalik sa budget kan SUCs pinaglaban kan minority group

Sa atubang kan pagpumirit ni Representante Gabriel H. Bordado Jr. asin pagiriba sa minority group maging kan Makabayan sa Camara-Baja na dapat ibalik na an budget sa state universities and colleges (SUCs) nangyari man giraray ngunian na 2024 national budget.

An budget nakalusot sa senado mantang antes magtiklop si 2023 inaprubaran ni Presidente Ferdinand R. Marcos Jr. an Php5.7 trillion para sa ngunian na taon.

Huli kaini, nagpahayag nin pasasalamat ki Bordado asin pagiriba sa Camara-Baja an SUCs kabali si Presidente Albert Naperl kan Central Bicol State University of Agriculture (CBSUA) na may main campus sa Pili, Camarines Sur.

Kan 2023 national budget nag-abot sa 51.23 % si budget cut kan 19th Congress sa CBSUA alagad sinabi ni Naperi ngunian na 2024 haros binalik si dating budget kan saindang Universidad.

Sa pahayag ni Bordado sa programang ‘‘May Boses Kita’’ sa RMN DWNX ninda naging Alcalde Abang Mabolo asin Atty. Mila Raquid-Arroyo na pinangenotan kan representante kan tercer distrito sa Camarines Sur asin saiyang pig-interpellate si Representante Estela Quimpo, Senior Chairman kan Appropriation Committee kun saen kukuanon an dakulang fondo sa P5.7 trillion na national budget alagad an simbag uutangon sa U.S, Japan asin iba pa mantang kulang si revenue kan gobierno nasyonal kan 2023 huli ta apektado si negosyo kan pandemya.

Binalikan kan assistant minority leader an saiyang kahuroton kan 2023 na dapat ibalik an budget sa SUC’s mantang nagtarabang-tabang pa an nasa minoriyang grupo nganing ilaban sagcod narealisar an pagbalik kan budget.

Magigirumduman si nangyaring budget cuts sa SUC’s kan 2023 an CBSUA ika-apat sa sampolong top 10. An iba pang mga SUCs na may dakulang budget cuts kan kaparejong taon iyo an Marikina Polytechnic College, 80.92 decrease; Marinduque State College, 79.97% decrease; Romblon State University, 63.47%; Mindanao State University, 23.27%; Bulacan Agriculture State College, 22.09% decrease; Batangas State University, 21.80% decrease; Don Mariano Memorial State University, 17.99%; Basilan State College, 17.03%; asin University of Southern Mindanao, 14.09%

Mandato sa 187 constitution na dapat an sektor nin edukasyon maninigo na tagamahan nin dakulang budget dawa na ngani sa 2024 national budget kan DepEd saro sa may halangkaw na budget, sabi pa kan assistant minority leader.

Piglaban kan lehislador na dapat ibalik an dakulang ginunting na fondo sa tahaw kan saiyang programa an futuro sa edukasyon makakatabang sa pag-asenso kan joveness asin nasyon. (DPAureus)