SA CIUDAD NIN NAGA: 3 grupo nin awtoridad sa Bicol kabale sa augmentation force

Pigseguro na kan manlaen-laen na grupo nin awtoridad sa Bicol na mapadara nin mga augmentation force ngunian na Peñafrancia festival sa Ciudad nin Naga na kinababalihan kan Philippine National Police kasabay an saindang Special Action Force (SAF), Philippine Army sa paagi kan 9th ID, asin Philippine Coast Guard tanganing maseguro an paz y orden sa kapiestahan ni Nuestra Señora de Peñafrancia.

Andam na an grupo bilang paseguro sa mga religious activities poon sa Traslacion procession sa Septiembre 13 sundo sa paghatod kan imahen ni Ina sa paagi kan Fluvial procession maging iba pang actividades civil kan lokal na gobierno kan ciudad.

Sinabi ni Regional Director BGen Andre Dizon kan Bicol PNP huli ta maabot sa on milyon na mga debotos an maruso sa ciudad poon sa traslacion procession sundo na matapos an actividades relihoso kaipuhan an dugang na fuersa nin mga awtoridad mala ngani nasa cinco mil an saindang augmentation force. Kabale sa grupo iyo an hale sa mga Municipal Police Station sa Camarines Sur na pinadara kan PNP Provincial Office.

An dagman na grupo nin awtoridad huli kan mahibog na marusong debotos mantang kabale sa dakulang actividad iyo an ika-100 taong na canonical coronation of Our Lady of Peñafrancia, sabi pa ni Dizon.

Ngunian na Septiembre 12, 2024 sarong aldaw antes kan Traslacion procession iyo an pag-arabotan sa Naga City Police Office kan augmentation force hale sa Bicol PNP.

Sa NCPO, sinabi ni City Director Erwin Rebellion nag-iimplementar na sinda kan Peñafrancia Festival gun ban poon kan Septiembre 5 na matapos sa laog nin viente diyas.

Nakatalaan magdestino nin kapupulisan sa gigibohon na Traslacion asin Fluvial procession kabale an iwawarak sa mga establisimiento de negosyo o sa centro kan ciudad saka mamantenir sa bulos nin trafico.

An Sangguniang Panlungsod taon-taon nagpapasar nin resolusyon na iimplementar kan NCPO an gun ban tanganing maseguro an dalagan kan paz y orden huli kan ribo-ribong debotos an nagsusungko sa ciudad.

Si Consejal Omar Buenafe kan SP na retiradong heneral kan PNP iyo an padreno kan resolusyon.