SA COMELEC: ACM Roadshows malibot sa mga barangay kan Naga

Igua na sanang apat na bulan antes kan eleksyon sa Mayo 12, 2025, an Commission on Elections (Comelec) sa Ciudad nin Naga malibot sa mga barangay nganing ipadagos an voters’ education campaign asin pag-demonstrar sa paggamit kan automated counting machine (ACM) na enot nang pigpunan an roadshow kan Deciembre 2, 2024.

Sinabi ni Abogado Maico Julia Jr. Election Officer kan ciudad na pig-aandaman na ninda an barangay na liliboton asin posibleng magtalaan sinda sa mall asin escuelahan.

Kan Deciembre 2024 igua nang anom na mga barangay an nalibot asin matalaan sa natatada pang 24 barangay kan ciudad.

Katuyohan kan Comelec na ibababa sa mga barangay nganing maheling an bagong ACM para sa maabot na eleksyon na piglalaoman ninda na dakul na botantes an maobserbar asin maparticipar sa pag-file up kan sample ballot.

Bako lang maheling ninda an bagong ACM envez itukdo an tamang pagboto asin dapat likayan na maheling kan saindang kataid na tukawan.

Sinabi pa kan Comelec Officer na iguang ‘‘14-inch touchscreen, privacy screen, faster scanning capabilities, receipt -cutting features, and the ability to transmit result instantly, an commission magamit nin star link asin GIPs technology.’’

Si enot na roadshow sa Naga ginibo sa IBP Building na pigparticiparan nin mga abogado, politico, opisyales de barangay, PWDs, asin iba pang sektor.

ACM Roadshow/Demonstration sa Barangay Lerma kan Deciembre 7 asin Del Rosario kan Deciembre 11 kan Ciudad nin Naga na nakatalaan ipadagos kan Comelec ngunian na Enero 2025 (Oeo Naga Comelec)