SA COMELEC VOTER'S REGISTRATION: Nagputik pagparehistro dai makakalusot sa ERB

Nagpatanid an Election Registration Board (ERB) kan Commission on Election sa Ciudad nin Naga na dai makakalusot sa sainda an nagpalista pa sa Comelec kan ciudad alagad dai nagtuga na sinda rehistrado nang botante sa ibang lugar.

Sa entrevista kan Bicol Mail ki Election Officer Maico Julia Jr. chairman kan ERB na sa ginibo nindang enot na hearing kan Abril 15, 2024 anom na nagrehistro sa Comelec kan ciudad poon kan Febrero 12 hasta Abril 15, 2024 alagad sa saindang pagserne kan record nadiscobre na anom an may mga double registration huli ta dai nagtuga na rehistrado bilang botantes sa ibang lugar.

Huli kaini, sa saindang desisyon pig-''delete'' na sa listahan kan Comelec Naga bilang mga botantes sa maabot na eleksyon sa Mayo 2025.

Sinabi pa ni Julia an gabos na ERB iyo man an saindang proceso mientras na computerized an Comelec asin ciertong dai makakalusot an mga double registrant.

Kan mga nakaaging election sa ibang municipalidades sa Camarines Sur nadiscobre kan Comelec na dakul an mga double registrant na posibleng iguang nasa likod na politico.

Sa padagos na pagserne kan listahan labi na sa diez mil na rehistradong botantes sa ciudad an pig-‘‘deactivate’’ mantang duwang veces nang nagpalyar na makaboto sa eleksyon.

An ERB na kumponido kan Election Officer bilang chairman, an duwang miembros kinababalihan kan School Division Superintendent kan Department of Education, asin jefe kan Local Civil Registrar kan LGU nagtalaan nin hearing sa Hulyo 15, 2024 sa labing 4,000 na nagpalista sa Comelec kan ciudad. Sinda iyo an ma-approved asin disapproved sa mga nagrehistro poon kan Abril 15, 2024 hasta Hulyo 15, 2024.

Huli kaini, suspendido ngona an mga ginigibong satellite registration sa mga barangay dawa nalibot na an 27 barangay alagad ipapadagos sa Agosto 2024 mientras na matapos an registration period sa Septiembre 30, 2024.

COMELEC NAGA. Suspendido ngona an satellite voter’s registration sa mga barangay tanganing andaman an nakatalaan na Election Registration Board (ERB) hearing sa Hulyo 15, 2024. (Bicol Mail)