SA FOOD SECURITY EMERGENCY: NFA CamSur-CamNorte abunda sa stock nin bagas

Dawa sundo sa Marso 2025 magbagsak suplay nin NFA rice sa mga lokal na gobierno o arin paman na ahencia de gobierno igua pang awad-awad na stock nin bagas an bodega kan National Food Authority (NFA) sa Camarines Sur-Camarines Norte, sabi ni OIC Branch Manager Marbin Malabanan.

Igua sindang nakatagamang 25 mil na sakong iluluwas hale sa bodega sa Camarines Sur mantang 10 mil hale sa satellite office kan Camarines Norte alagad sagcod sana ini ngunian na bulan nin Febrero 2025 base sa orden kan saindang opisina sentral. An presyo kan NFA rice P35.00 cada kilo kun duwang bulan nang naka-stock asin P28.00 kun tolong bulan nang naka-stock sa saindang bodega. An ahencia nagtutubod mantang harani na an eleksyon nganing dai mahaloan nin politica dapat mga Kadiwa Center an magpabakal.

Sa ngunian igua pa sindang 328,631 cavan na stock nin paroy alagad kun momolinohon abot pa sa 232,532 cavan nin bagas.

Ini an pigseguro ni OIC Branch Manager Malabanan kan NFA Camarines Sur - Camarines Norte kan makuanan nin entrevista kan Bicol Mail kasunod kan pagdeclara nin food security emergency ni Sekretaryo Francisco Tiu Luareul Jr. kan Department of Agriculture (DA) kan Febrero 3, 2025 huli sa paglangkaw sa presyo kan lokal na produkto nin bagas sa mga mercado.

Matapos kan Department Order No. 03 kan DA, an OIC Branch Manager kan NFA CamSur-CamNorte insigida siyang nagpadarang surat sa mga LGUs, district offices kan congresista asin iba pang awtorisadong ahencia na puede nang magbakal nin suplay nin NFA rice sa saindang bodega.

An opisina kan NFA sa Camarines Sur asin Camarines Norte pigsaro na sanang sanga kasunod kan implementasyon kan Rice Tariffication Law.