SA KASONG PANGAGADAN KI DRA ROMUALDEZ: Person of interest suminuko na sa NBI sa Sorsogon

Ni Paulo DS. Papa

PAKALIHIS kan nagkapirang aldaw suminuko na si Raymart Martinez, an pigtutugdong person of interest sa kasong pambabadil-gadan ki Dra Rajean Monnette Romualdez kan hapon nin Miercules, fetsa 19 nin Febrero sa madagat na porsyon kan Matnog, Sorsogon.

Si Martinez iyo an lalaking huring nakaiba ni Romualdez bago makuang gadan asin may tama nin bala sa walang parte kan payo sa laog kan Toyota Vios na auto kan Dominggo, alas-2:00 nin hapon sa Kalye Princeton, Baryo Monterey, Barangay Concepcion Pequeña, syudad nin Naga.

An National Bureau of Investigation (NBI) iyo an buminitbit ki Martinez hale sa Sorsogon pasiring sa district office sa syudad nin Naga kun haen ini pigkostudiya paramientras.

Sa paghampang kaini sa prensa pigsabi ni Martines na sa abogado niya sana ini mataong mga pahayag manunungod sa pagigin imbwelto kaini sa kaso.

Tuminuro an luha kaini kan mapaguirumduman mapadapit sa ika-37ng kompleanyo kan doktora sarong aldaw pakalihis kan pagsuko kaini.

Si Senior Agent Joey Ajero nagsabi man sa miembros kan local na media na matabang an NBI sa pagdalagan kan isusunad na kaso laban ki Martinez na madepende na sa Philippine National Police.

Segun pa ki Ajero, makakatao an NBI nin mga nakolektar na ebidensya tanganing magin pusog an kaso na puedeng isunad kan pulisya laban sa nasambit na lalaki.