SA MGA NOMBRADONG OPISYALES DE BRGY: Prohibido mag-endorso nin candidato - Comelec

Sa tahaw kan pagsikad kan campaign period kan Marso 28, 2025 sa mga candidato lokal an Commission on Election (Comelec) Bicol nagpatanid sa mga nombradong opisyales de barangay na prohibido sa sainda na mag-endorso nin candidato sa midterm elections, mantang ‘‘nonpartisan’’ an saindang posisyon.

An patanid binaba ni Regional Election Director Maria Juana Valeza huli ta an tinutugotan sana an mga elehidong opisyales de barangay alagad an mga nombrado na kinababalehan kan tesorero sa barangay, mga secretaryas, mga tanod, asin barangay health workers, estrictong binabawalan na mag-endorso nin candidato lokal maging nasyonal, dawa sa paagi nin campaign materials o in person sa panahon kan kampanya.

An isyung ini nagluwas sa ginibong forum na padreno kan Department of Interior and Local Government (DILG) sa Ciudad nin Legazpi na yaon an presencia kan mga opisyales de barangay asin nombradong opisyal kan barangay.

Mientras tanto, enot naman kaini an Civil Service Commission nagsabi na prohibido sa mga empleados kan gobierno na magkampanya sa arin man na candidato sa maabot na eleksyon sa Mayo 12, 2025.

Sinda mga nombrado alagad kun nagplantiar nin certifico de candidatura sa Comelec ‘‘deem resigned’’.

Kasabay sa enot na aldaw kan campaign period kan Marso 28, an komisyon sa mga opisina lokal liwat naglansar nin operasyon baklas kan mga campaign materials na pinadukot luwas sa designadong common poster area.