SA PAAGI KAN ANGAT BUHAY: Bangon Naga donation drive nakatipon P31.2-M

Sa laog sana nin limang aldaw huli kan pagtitiwala kan publico nakatipon nin Php31.2 milyones hasta kan Oktubre 28 an BANGON NAGA donation drive para sa mga biktima kan Bagyong Kristine sa Ciudad nin Naga.

Sa paagi kan Kaya Natin! Movement, Jesse M. Robredo Foundation, asin Angat Buhay na pinamamayohan ni Atty. Leni Robredo tolos nagpaabot nin dakulang pasasalamat an dating Bise Presidente.

Sa saiyang FB Page ‘‘ Thank you for your generosity and compassion for your fellow Filipinos in need. We are truly humbled and in awe of your outpouring of support. Sa madilim na yugto na ito ng ating mga kababayan, ang ating bayanihan ang nagbibigay-liwanag at pag-asa sa kanila’’

Kan magkulpa si bagyong Kristine, sa paagi kan pangapodan ni Atty. Robredo sa saiyang FB Page sa tahaw kan dakulang pagtitiwala sa saiyang bilang pamayo kan foundation, marikas si mga nagresponde kan manlaen-laen na grupo, negosyante asin iba pang sektor nasyonal asin lokal kabale na an nagkaperang mga showbiz personalities sagcod nakatipon nin milyones pesos na cantidad. Yaon pa an mga ‘‘in-kind donations’’ lunad sa truck.

Hale sa mga donasyon tolos man nagpapadara nin relief goods sagcod nakasuble nin baroto nganing madarahan nin ayuda an mga nag-eestar sa mga baha pang barangay kan ciudad asin pagtaraid na banwaan.

An Angat Buhay nagpapadara pa nin tabang sa iba pang mga apektado kan nakaaging calamidad.

Naglusong sa tubig baha si Atty. Robredo kaibahan an Angat Buhay volunteers nganing maghatud nin relief goods sa mga baha pang barangay sa Ciudad nin Naga. (Photo: Raffy Magno FB)