SA PAGPALAWIG KAN TERM OF OFFICE KAN BRGY, SK: Pampa-pogi sana kan mga senador

Natutuyawan kan sarong dating Liga ng Barangay President asin miembro kan Sangguniang Panlungsod kan Ciudad nin Naga na risang pampa-‘Pogi’ sana kan mga senador an pagkakalusot sa ika-tolo asin huring pagbasa kan bill na nagpapalawig sa term of office kan opisyales de barangay asin Sangguniang Kabataan (SK).

Ini an mga pahayag ni Consejal Vidal Castillo kan ciudad matapos aprubaran sa plenary session, kan veinte dos (22) na mga senador na nagboto pabor sa Senate Bill 2816, na mayong abstention asin negative votes.

Cada panahon na madali na an eleksyon lokal magin nasyonal parating nagpapasar kan kaparehong bill sagcod nakaabot sa Corte Suprema.

Sa desisyon kan SC kan 2023 an pagpalawig kan BSKE asin extension of the terms of BSK official are unconstitutional, sabi pa ni Castillo.

Maagi pa sa kamot ni Presidente Ferdinand Marcos Jr. kun aaprubaran o ibabasura an bill.

An bill na nagsisibog kan barangay asin SK elections pigtalaan sa Oktubre 2027 envez na Deciembre 2025.

Sa sinambit na bill, an ‘‘term of office'' kan gabos na elehidong opisyales de barangay asin miembros kan SK magigi nang apat na taon. Alagad mayong elehidong opisyales de barangay na maserbe na labi sa tolong sunod-sunod na termino sa kaparejong posisyon.

Saiya pang sinabi na si mga ma-re-eleksyon dapat dai mahandal sa laban sa pirilian kun marhay an saindang performance alagad si nagtuturog na opisyales iyo an namemeligro.