SA PNR: Pagsara kan mga railroad crossing maagi sa proceso

Kabale sa mga dai awtorisadong railroad crossing na planong sarahan kan manijamiento kan Philippine National Railways (PNR) iyo an inaagihan nin mga vehiculo asin estudiantes kan sarong escuelahan sa Panganiban Drive, Ciudad nin Naga alagad oras na iimplementar na kan perokaril papadarahan nin noticia an arin man na apektadong lugar.

Andam an manijamiento na mag-atubang sa negosasyon sa mga apektadong lugar siring kan LGUs na nagbugtak kan ilegal na railroad crossing.

An planong ini kan perokaril gigigibohon antes matapos an taon 2024 bilang aksyon sa mga nangyaring insidente na biglang nabalyong tawo maging vehiculos mala ngani igua nang veinte mga nairedo asin anom binawian nin buhay poon na magbalik an viaje kan commuter train Naga-Ligao asin Naga Legazpi kan Hulyo asin Deciembre 2023.

Preparado na mag-atubang an manijamiento sa arin man na barangay, LGUs maging escuelahan na apektado nganing magkaigua nin negosasyon.

Kabale sa proceso na hahagadon kan manijamiento kan perokaril bugtakan nin personajes an ilegal na crossing nganing dai tugotan an arin man na indibidwal asin vehiculo na magbalyong relis kun maagi an train.

Ini an pinakahuring plano kan PNR Bicol kasunod kan dai palang nahahaloy na pag-atubang sa press conference sa Ciudad nin Naga kan manijamiento sa pamamayo ni Atty. Celeste Lauta.

Sa press conference pigbuyagyag kan PNR na igua nin total na 89 dai awtorisadong crossing sa Bicol na ginibong pedestrian nin mga tawo asin vehiculo.

An planong sarahan iyo delicado sa mga aksidenteng veinteng crossing sa Camarines Sur asin Albay antes matapos an taon 2024.

An pagbugtak nin mga dai awtoridong crossing gibo kan LGUs sa katuyohan na agihan nin vehiculos asin mga tawo.

Railroad crossing sa Panganiban Drive, Ciudad nin Naga kabale sa listahan kan PNR Bicol na dai awtorisado asin kaayon sa planong pasarahan kan manijamiento. (Retrato kua kan Bicol Mail)