SA SWMO: Waste to energy o pahiwason an landfill sa Brgy San Isidro

Naghihibog an toneladang basura an binabagsak aroaldaw sa Sanitary landfill sa Barangay San Isidro alagad sa ngunian amay nang pig-aandaman kan City Hall an mga alternatibong plano siring kan long term plan kan Solid Waste Management Office (SWMO) sa waste disposal.

Ini an mga pahayag ni Engr. Joel Martin, jefe kan SWMO kan ciudad na kabale sa pig-aadalan an long term plan kan waste disposal para sa masunod na lima hasta sa sampolong taon na plano. Siring kan enot na pigtutulod na Waste to Energy o expansion kan landfill.

Saiyang pigbuyagyag na kan Bagyong ‘Kristine’ nakakolecta nin basura na nasa 14,300 tonelada katumbas na ini nin nasa 119 diyas na regular nakokolectang basura sa Naga. ‘‘An Sanitary Landfill po kaya pa maaccomodate si waste generation ta estimated mga five years pa’’, sabi ni Martin.

Maging kan Deciembre 24, 2024 nakakolecta naman sinda nin 277.65 tons, deciembre 25 – 179.98 tons, Deciembre 31 – 153 tons, asin kan Enero 1 – 277.28 tons kumpara kan nagtalikod na taon nakakolecta sana sinda nin 94 tons boot sabihon nag-triple an nakolectang basura asin consideradong alarming.

Sa ngunian igua nang sampolong garbage trucks an ciudad asin hinahagad pa kan SWMO na magdagdag pa an City Hall huli ta nagpaparadakula an mga hinahakot na basura sa sentro commercial maging sa iba pang mga barangay.