SA SYUDAD NIN NAGA: Del Castillo, del Rosario pigheheling pagdalagan para alkalde, bise alkalde

“KAYA mi man na padalaganon an syudad.”

Iyan an pigbutasan na tataramon ni Konsehal Salvador “Buddy” del Castillo pagkatapos niyang ibareta sa atubangan kan mga myembros kan lokal na media na igwa sindang plano ni Konsehal Joselito “Lito” del Rosario na mag-file nin Certificate of Candidacy para sa kargong alkalde asin bise-alkalde kan syudad nin Naga.

Bago kan sinambit na pahayag, pigtawan du-on ni del Castillo na seryoso sinda dapit sa planong magkandidato, alagad sa mga aldaw na ini, pigiisipan pa ninda kun siisay an makandidato para alkalde asin bise-alkalde.

Kan pighagadan nin rason kun taano ta igwa kan siring na plano an duwa, sinabi ni del Castillo na “kaya mi na, kaya mi nang padalaganon an syudad.”

Dapit sa hapot kun kumbensido siya sa pigsasabing consultation, sarong pigootob na proseso sa pagpili kun siisay an mga papakandidatuhon sa lindong kan Team Naga, marikas na nagsimbag an abogadong konsehal na “It’s too far! It’s too far!”

Paliwanag ni del Castillo na poon pa sa pakapoon kan magbutwa an mga isyu sa pulitika sa laog kan syudad nin Naga, “para sa sakuya, an perception ko from the very start, igwa nang haman na desisyon. Sinabi pa kaini na kun igwa man nin proseso, an siring na lakdang sarong paagi na sana iyan bilang confirmation.

Sinabi pa ni del Castillo na siring kaiyan an basa niya mantang bako naman daa siyang baguhan sa pulitika. Nagpoon an bida-pulitika kan konsehal na pigmimidbid saro sa mga batikanong lehislador kan syudad asin nagseserbing built-in fiscalizer poon pa kan taon 2004.

Pigtuyaw pa kaini an mga enot na proseso na kun saen igwa man giraray na mga nagdalagan o nagkandidato dawa dae man naka lusot sa consultation. Sa huring parte kan intrivista, sinabi ni del Castillo na daeng gayo siya kumbensido sa siring na mga proseso.

Saro pa sa mga nagbutwang isyu iyo an equity of the incumbent na habong tawan nin dalan kan mga nangengenot sa Team Naga ngonian. Sinabi kan konsehal na pigtatawan nin respeto an siring na prinsipyo magin kan panahon ni depuntong Jesse Robredo.

Dapit sa mga isyu na pigdaklag laban sa mga opisyales kan syudad, sinabi pa kan konsehal na sagkod sana ini sa alegasyon asin dae napatotoohan dawa saen na orolay o tiripon.

“The one accusing someone of wrongdoing has the responsibility to prove their allegation, not the person being accused. The burden of proof lies with the accuser, not the accused, and it cannot be the other way around. Even a criminal is presumed innocent until proven guilty,” agyat pa kan konsehal sa mga parasahot.

KAYA MI! Sinda City Councilors Lito del Rosario (yaon sa wala) asin Buddy del Castillo maogmang pigbareta an saindang pighahaman na plano para sa 2025 elections. RETRATO KI MIKE MARFEGA