SA TS KRISTINE: Nagbagsak nin 3K MM mga pag-uran sa Bicol

Uminabot sa 3,120.00 millimeter (MM) an binagsak nin mga pag-uran na naglaila sa Kabikolan huli kan bagyong ‘‘Kristine’’ poon kan Oktubre 21, 22, 2024 o naglangkaw nin 1,020.70 MM kumpara sa 2,049.30 MM sa normal rainfall para sa bilog na bulan nin Oktubre, sabi kan Philippine Atmospheric and Geophysical Astronomical Services Administration (PAGASA) Southern Luzon.

Ini an causa kan mahiwas asin hararum na mga pagbaha sa rehiyon alagad an Camarines Sur asin Camarines Norte iyo si dakula si binuhos nin uran sa laog kan duwang aldaw.

Sinabi ni Ms Ruth Cala, weather forecaster kan PAGASA Southern Luzon kan maconduciran nin entrevista kan Bicol Mail an saindang ahencia amay nang nagpaluwas nin Red rainfall warning sa publico huli sa piglalaoman na grabing mga pag-uran, pagbaha asin pagguho nin daga.

Sa pinaluwas na datus an Camarines Sur dapat igua sanang 280.60 MM normal rainfall sa bilog na bulan nin Oktubre 2024 alagad kan Oktubre 21-22 nagsakat sa 896.60 MM;

Sa Camarines Norte na dapat igua sanang 489.60 MM na mga pag-uran sa laog kan bulan nin Oktubre alagad sa duwang aldaw nag-abot sa 606.00 MM; Sa Albay para sa bulan nin Oktubre dapat igua sanang 321.4 MM normal rainfall alagad nagsakat sa 333.00 MM; Catanduanes para sa bulan nin Oktubre dapat igua sanang 398.5 MM normal rainfall alagad nagsakat sa 482.00 MM; Sa Sorsogon dapat igua sanang 404.80 MM normal rainfall para sa Oktubre alagad nagsakat sa 587.00 MM asin Masbate iguang 203.90 MM normal rainfall nag-abot sa 216.00 MM.

Sinabi pa kan PAGASA oya an saindang mga pinapaluwas na patanid, nagpopoon pa sana iyo an yellow warning nagsunod iyo an orange rainfall warning na igua nang mga homa nin makusog na mga pag-uran, baha asin pagguho nin daga asin an pinakalangkaw iyo an red rainfall warning piglalaoman an makusog na mga pag-uran pagbaha asin pagguho nin daga.

Haros gabos na LGUs nag-oosipon na an nangyaring calamidad iyo na an pinakalawig na mga pag-uran asin hararum na tubig baha.

Gabos na LGUs sa rehiyon nagdeclara nin state of calamity.

Lubog pa sa tubig baha sa Nabua, Camarines Sur sa kuang retrato kan Rainer Photography kan Oktubre 25, 2024.