SABI KAN COMELEC: Paghipno, promosyon sa mga bakanteng posisyon sa gobierno sundo pa sa Mar 28

Nasisibot na an mga LGUs sa pag-fill up kan mga bakanteng posisyon nganing dai na hagopon sa prohibisyon kan Civil Service Commission (CSC) na nagbabawal sa pag-nombra nin bagong empleados maging pagcrear nin bagong posisyon asin promosyon nganing dai na aboton kan election ban.

Si Abogado Maico Julia Jr, Election Officers kan Commission on Election sa Ciudad nin Naga nagsabi na susog sa prohibisyon kan CSC ma-epekto ini sa Marso 28 hasta Mayo 11 ngunian na taon.

Dakul nang mga jefe ejecutivo na matapos na kan saindang termino o macandidato sa ibang mga elected position padagos na sa pagnombra nin mga empleados orog na sa mga bakanteng posisyon.

An CSC nagpagirumdum sa mga ahencias de gobierno kan dapit sa prohibisyon sa panahon kan election period.

Nagpatanid an komisyon sa mga ahencias de gobierno maging sa LGUs na dapat magsunod sa mga guidelines sa pag-epekto kan election period poon Enero 12 hasta Hunyo 11, 2025.

Kabale sa saindang pinagbabawal iyo an pagbalyo sa empleados sa ibang departamento sagcod na mayong permiso sa Comelec.

Sa ngunian pig-aandaman kan mga Comelec Officers iyo an pigtalaan na training-seminars sa mga paratukdo sa operasyon kan ACM Machine na gagamiton sa piirilian sa Mayo 12, 2025.

Igua nang ginibong coordinasyon an Comelec sa DepEd kan mga paratukdo na maserbe sa aldaw nin eleksyon.