‘Shearline’ nagwalat naman P6.9-M danyos sa sektor agricultura sa Bicol

Pili, Camarines Sur --- Nagwalat naman nin milyones de pesos na danyos sa sektor agricultura sa Bicol an tubig baha huli kan ‘shearline’, mala ngani sa pinakahuring datos nagsakat na sa Php6.9-M, sabi kan Department of Agriculture (DA).

Si Lovella Guarin, regional spokesperson kan DA Bicol nagsabi kadakle kan naapektaran iyo an kaomahan, mga kamaisan, high value crops maging mga parasira.

Nag-abot sa 5,414 paraoma sa rehiyon an apektado sa 4,305 na hektaryas na kaomahan mantang sa total damaged iguang 3,217 hektaryas asin igua man nin partially damaged na 1,049 hektaryas.

An danyos sa sektor agricultura base sa sinusumiter na report sa DA hale sa mga Municipal Agriculture’s Office (MAO).

Agrangay na an sinambit na sektor huli ta haros cada ika-perang bulan iguang mga nangyayaring calamidad orog na an tubig baha mala ngani sa datos kan ahencia sa bagyong ‘‘Kristine’’ nagwalat nin Php3.2-B na danyos. Huli kan dakulang danyos sa sinambit na sektor apektado man an produksyon sa paroy asin iba pang produkto agricultural.

Sinabi pa ni Guarin, si mga apektadong paraoma makakarecibe nin libreng banhi bilang saindang ayuda sa mga paraoma.