SA PALARONG BICOL 2025: LGU Legazpi, DepEd nag-aandam na

Pig-aandaman na kan local na gobierno sa Ciudad nin Legazpi asin Department of Education (DepEd) an maabot na Palarong Bicol 2025 sa Marso 22 hasta 29 na piglalaoman paparticiparan nin cinco mil na atleta saka coaches hale sa anom na provincia kan rehiyon asin mga ciudades.

Si DepEd Regional Sports Officer Francisco Dexter Sison nagpahayag sa prensa na nagkaigua sinda nin coordination meetings and planning sessions na inatendiran kan iba pang ahencias asin LGU kan Ciudad nin Legazpi na iyo an presentador bilang pag-andam sa Palarong Bicol 2025.

Padagos na inaandaman an mga billeting center na eestaran kan mga atleta na dedestinohan nin personajes kan PNP katuwang an barangay tanod sa pagtao nin seguridad sa mga delegasyon na hale sa manlaen laen na 13 division kan DepEd.

Seseguradohon man na kumpleto an facilidades kabale an tubig, comfort room asin turogan.

Sinabi man ni DepEd Regional Director Gilbert Sadsad na an pang rehiyonal na karawat saindang tinutulod an sportsmanship mantang saindang pigseseguro an amay na preparasyon sa seguridad sa mga atletang Bicolano.

Liwat sindang magkakaigua nin urulay sa Marso 7, 2025 para sa playing venues na an iba iluluwas sa Ciudad nin Legazpi.

Sa ngunian pataposon na an ibang mga ginigibong Palarong Panlalawigan na marepresentar kan saindang ciudad asin provincia.

An Ciudad nin Naga iyo si naging overall champion sa ginibong Palarong Bicol 2024 asin padagos an ensayo kan saindang mga atleta nganing makawikaw liwat an championship.

An Palarong Pambansa 2025 venue nakatalaan man darahon sa Ferdinand E. Marcos Stadium, Ciudad nin Laoag.