SSS Goa Service Office pigbalyo sa San Jose
Ni Sonny Malate
Pigbalyo kan primerong semana kan bulan na presente an Goa Social Security System (SSS) Service Office sa banwaan kan San Jose. An pagbalyo huli sa pagtapos na kan contrata sa pigrentahan na sarong privadong edificio na pirang taon pig-ocupar kaini.
An oficina kan SSS Goa consideradong sarong large service office mantang an sa San Jose mahalat pa kan magiging categoriya kaini base sa patakaran kan SSS mismo.
Si Rene Hector Villareal, Officer-in-Charge, dakula an pag-apreciar asin pasasalamat ki Alkalde Jerold B. Peña sa pag-acomodar kan saindang oficina sa saiyang banwaan na libre sana, apwera kan bill sa kuryente, internet asin supply nin tubig.
An pagkakaigua kan sanga kan SSS sa San Jose nagcocomplemento sa esfuerzos kan alkalde na maparani an servicio kan gobyerno sa mga namamanwaan digdi.
Sa presente, an admin office kan SSS San Jose temporaryo munang nasa 3rd floor kan Pimentel Bldg. 1 na nasa likod kan lumang Municipal Hall. An membership section yaon sa ground floor kan municipal hall.
Segun ki Villareal, an permanenteng San Jose SSS office mamumugtak sa lumang market building sa barangay Boclod harani sa Rural Health Unit. An pag-ocupar kan permanenteng oficina posibleng mangyari sa masunod na taon pa huli sa renovation na gigibohon base sa specificasyon kan SSS mismo.
Pigtawan doon kan Officer-in-Charge na base sa patakaran kan SSS, an mga over the counter transaction arog kan pagproceso kan retirement, death benefit asin ibang complicadong transaction ginigibo sa SSS Naga. Sa San Jose SSS iyo man an mga general membership concern, inquiry asin ibang simpleng transaction.
Sa ngonian, an SSS 90 por ciento na an digitalization kaya on-line na an kadaklan kan transaction. Nanotaran ni Villareal na an mga may edad na medyo nadedeficilan sa arog kaining sistema kaya sinda pig-aasistehan kan personahes ninda.
Dinagdag pa kan officer-in-charge na an SSS San Jose aasikasohon an pagkakaigua nin dagdag na payment center para sa conveniencia kan mga miembros digdi asin pagtaraid na banwa.
Pig-admiter ni Villareal na mantang nasa primerong mga semana pa sana an SSS San Jose naninibago pa an mga miembros sa epekto kan relocasyon kan oficina.
Pighihiling kan Officer-in-Charge na an situacion na ini sarong oportunidad sa sainda para maglatag nin mga sistema tanganing orug na maserbihan an mga namamanwaan kan sampolong banwaan kan Partido, kaibahan an banwaan kan Ocampo.
Katakod kaini, an pagdulok kan saindang mga personahes mismong sa lugar kan mga miembros an gigibohon tanganing maging efeciente, marikas asin conveniente an mga servicio ninda.
Mientrastanto, nangapodan si Villareal sa mga employer kan saindang obligasyon sa mga empleados para sa SSS membership ninda. Siring man, sa mga nasa informal sector, an kahalagahan kan pagiging miembro digdi tanganing magkaiguang beneficio para sa sainda.
Comments