Suplay nin tubig apektado na kan El Niño

An manijamiento kan Metropolitan Naga Water District (MNWD) sa Ciudad nin Naga nagkumfirmar sa Bicol Mail na apektado na an suplay nin tubig sa saindang mga spring source saka sa mga pumping station huli kan El NiÑo phenomenon alagad nagseguro sa consumedores nasa normal level an saindang suplay.

Kun igwang mga barangay na turo-turo an nagluluwas na tubig sa mga gripo yaon an saindang lorry truck nganing maghatod nin tubig, sabi ni Jesus Salvador ‘‘Choppy’’ Dela Cruz opisyal na parataram kan MNWD.

Dawa sinasabi kan MNWD na nasa normal level an saindang suplay alagad nagrereclamo an mga consumedores nin tubig sa Barangay Pacol, San Felipe, Cararayan asin San Isidro huli kan halawig na oras nawawarang bulos nin tubig sa saindang residencia mantang an paliwanag kan manijamiento iyo an pagbagsak kan saindang gen set na padagos pigreresolberan.

Sa ngunian si dating 30 por cientong nakukuang suplay nin tubig sa spring source nagbaba sa 25 por ciento mantang sa mga pumping station igua pang 75 por ciento.

An mga burabod nin tubig kan water district duwa sa Asupri, Barangay Panicuason, Ciudad nin Naga asin duwa sa Barangay Del Rosario, Pili, Camarines Sur.

Sa tahaw kan maabot na sa 60 mil na activong consumedores hali sa Ciudad nin Naga, Camaligan, Gainza, Magarao saka Canaman nagpapaconstruir nin dugang na mga pumping station sa Pacol 5 asin Carolina 5 na dai mahahaloy magiging operational na mantang igua nang total na 30 pumping station, sabi pa ni Dela Cruz.

Inaabot na nin Php15,000 hasta Php20,000 an pagpaconstruir nin pumping station.

Sinabi pa na oras magin operational an Pacol 5 Pumping Station makakatabang sa dugang na capacidad kan MNWD mantang magbuboga nin sagcod sa 45 litros cada segundo.