Sutil sa ley trafico dai makakalibre sa LLI

Nagpatanid an LTO District Office sa Ciudad nin Naga na dawa nagbalga sa traffic ordinance kan sarong LGU an arin man na madadakop na tsuper magkakaigua na nin ‘'demerit point direkta sa LTO system’’ asin dai na calificado sa ten years validity period sa pag-renew sa saindang lisensiya sa pagmanijo.

An jefe kan LTO District Office kan Naga na si Grace Rojas nagpahayag kaini sa tahaw kan nag-iimplementar na an Public Safety Office sa Ciudad nin Naga kan LTO-LGU connectivity (LLI) asin igua nang mga na-iisyuhan nin tiket sa traffic violation maging lokal asin ley nasyonal sa trafico.

Huli sa LLI, saiyang sinabi na an mga nagkakadarakop sa ley trafico sa Naga puede nang nagbayad sa pay maya o sa 711 asin sa City Hall alagad kun pagbalga sa ley trafico nasyonal dapat magbayad sa LTO.

Sinabi ni Executive Director Renne Gumba kan PSO sa City Hall na padagos na nindang pig-iimplementar ngunian na Hulyo 2024 an LLI mala ngani igua nang mga nagkakadarakop maging sa saindang pagsabay sa One-Time Big-Time kan Naga City Public Safety Office.

An LLI iyo an single ticketing system na pigponan iimplementar sa Metro Manila kan Agosto 15, 2024 asin digdi sa Bicol sa Naga pa sana nag-papasunod.

Mayor na katuyohan kan programa nganing malikayan an isyu sa kurapsyon laban sa traffic enforcer asin para mayong problema magsunod sa regulasyones sa trafico.