Tigsik

Tigsik ko ining mga kapamilya, amiga,amigo

Na sa ngunyan nasa pagmundo an mga iniho

Orog an mga paraantabay ni Ernie Verdadero

Ta naamay nang nag “sign off ” sa Ini an Totoo

Tigsik ko man an dengue sa panahon na ini

An mga nabibiktima nakakahirak asin terible

Kun dimalas, sa kagadanan dai makakalibre

Kaya mga kahimanwa, dapat maglikay pirmi

Tigsik ko man an makatakot na namok baga

Mga ginadan na grabe, daog pa an bilang daa

Nin mga soldados na nakipaglaban sa giyera

Kaya dapat magrilinig kita kan kapalibutan ta

Tigsik ko pa an mga tutuong Kristiyano talaga

Mga atang sa diyus-diyusan maglikay na kita

Dai magkakan kan handa kun igwang piyesta

Kontra sa mga tugon nin Diyos na nasa Biblia

Tigsik ko ining mga aki na an ugali sumbikalan

Ta mili gahos na, matumang na sa magurang

Dawa pira pa an maresibing award o bulawan

Mga sakripisyo ninda dai mo kayang tampadan