Tigsik

Tigsik ko an mga bagito sa showbiz baga

Bago minasikat, namamanyakis na ngona

Sa kamot nin mga bading na dusta talaga

Na sa mga linta na ini makaheherak sinda

Tigsik ko an iba na pirming nasa irinuman

Mantang nag-iirinom siging diriskusyunan

Sa mga pagdiskusyon may nagkakairinitan

Kaya pirmi nang karadugan an kinaaabtan

Tigsik ko an mga tawong dai nakokontento

Sa kun ano igwa sa buhay o sa pagkatawo

Hitsurang itinao kan Diyos dai pa daa gusto

Nagpaparetoke, ta an sadiri pirit binabago

Tigsik ko ngunyan si satanas na sibot-sibot

Na mga tawo madara sa paggibong maraot

Kaya dakol na krimen, nangyayari sa palibot

Kun dai magbarakli sa kalayo gabos ihuhulog

Tigsik ko man ngunyan an iba sa mga kaakian

Na nalilingaw na sa sakripisyo kan magurang

Pagkatapos na pinaadal, inataman, tinabangan

Kan magkatrabaho, mga magurang nalingawan